Duke tentuar ta mbrojë Bashën, Armend Muja komisionin për dokumentimin e krimeve të Serbisë e paraqet sikur është themeluar për krime të pasluftës

Lajme

Gazeta Express

29/08/2025 6:58

Deputeti i Lëvizjes Vetëvendosje, Armend Muja, duke tentuar ta mbrojë kryetarin e ri të Kuvendit, Dimal Bashën, për punimin e tij skandaloz kundër UÇK-së, i është kthyer së kaluarës, duke pretenduar se kundër UÇK-së kanë punuar LDK e PDK.

Ai për këtë ka përdorur një dokument të vitit 1998, kur kryesia e LDK-së kishte formuar komision për hulumtimin e krimeve nga regjimi serb.

“Kur jemi te UÇK, Dimali doli dhe kallxoi të vërtetën e atij punimi, edhe profesoresha, autorja tregoi që ai është përgjegjës veç për Kapitullin 3 që s’ka lidhje me UÇK-në. Por, kur jemi te UÇK, t’i kujtojmë disa gjëra që ta kapim çështjen në thelb: 1. A ju kujtohet kur LDK themeloi grupin për hetimin e krimeve të pasluftës me në krye Eqerem Kryeziun? 2. A ju kujtohet kur PDK e LDK krijuan Specialen? 3. A ju kujtohet kur Enver Hoxhaj kishte thënë se nëse fiton UÇK unë marrë azil në Serbi? 4. Besoj, ju kujtohet edhe kur Presidenti i shtetit vizitonte pllakat e të vrarëve serbë në të cilat shkruante se ishin vrarë nga terroristët shqiptarë, pra UÇK, në Gorazhdec të Pejës dhe Grackë të Lipjanit.”, thuhet në postimin e tij.

Pas këtij shkrimi të Mujës, ka reaguar Naser Rugova, ish-deputet i LDK-së.

“Sonte një deputet i VV paska publikuar këtë vendim të LDK-së datë 19 nëntor 1998, kur Kosova ishte përfshirë nga flakët e luftës, vrasje, shkatërrime dhe deportime të popullatës civile, në përmasa gjenocidi nga regjimi i Millosheviqit. Kryesia e LDK-së kishte formuar komision për hulumtimin e krimeve nga ky regjim kriminal, me emra eminent, ishtë bërë dosja për Tribunalin Ndërkombëtar për Krime Lufte kundër Serbisë, dosjen e kanë pregaditur avokatë dhe juristët më të shquar të kohës në krye me avokatin Bajram Kelmendi, të cilin ky regjim kriminal e ekzekutoi së bashku me dy bijtë e tij, mu për shkak të kësaj dosje!”, ka shkruar Rugova.

Ai ka thënë se “duhet me qenë tepër miop, i lig dhe gjakpërzier, hibrid i keq dhe antishqiptar të pretendosh me keqpërdorur këtë dokument”.

“Mbahu Kosovë!”, ka shtuar Rugova.