Drejtori i Juventusit: Jemi të kënaqur me Allegrin, po bën punë të shkëlqyer

Sport

Gazeta Express

19/04/2024 23:38

Drejtori i Juventusit, Cristiano Giuntoli, këmbëngul se klubi është “shumë i kënaqur” me punën e Massimiliano Allegrit dhe nuk do të diskutojë të ardhmen e tij përpara se të sigurojë një vend në Ligën e Kampionëve.

Tani është zyrtare që pesë më të mirat në Serie A do të kualifikohen për turneun e ri të zgjeruar të Ligës së Kampionëve sezonin e ardhshëm, kështu që “Zonja e Vjetër” pritet të jetë në mesin e tyre, transmeton Gazeta Express.

“Ne nuk po shikojmë mbi supet tona, do të përpiqemi të bëjmë më të mirën, të arrijmë objektivin që kemi vendosur me Allegrin në fillim të sezonit dhe ta arrijmë atë sa më shpejt të jetë e mundur”, tha Giuntoli për “Sky Sport Italia”.

“Ne jemi të kënaqur për futbollin italian që tani ka pesë vende për klubet e Serie A”, shtoi ai.

Në mënyrë të pashmangshme, pyetjet për Giuntolin ishin për të ardhmen e Allegrit në stolin e Juventusit. Trajneri italian ka një kontratë të vlefshme deri në qershor të vitit 2025.

“Ne jemi shumë të kënaqur me trajnerin, ai po bën një punë të shkëlqyer me djemtë. Në fund të sezonit, kur të kemi të gjitha letrat në tavolinë, do të jemi në gjendje të planifikojmë të ardhmen. Ai ka një kontratë, në këtë moment ne duam të vendosim të gjithë fokusin tonë në objektivat që duam të arrijmë këtë sezon”, deklaroi drejtori i klubit nga Torino.

Giuntoli u pyet gjithashtu se “a mundet Juventusi t’i ofrojë Allegrit një kontratë të re apo ta lërë të përfundojë deri në qershor 2025”?

“Trajneri ka një vit të mbetur në kontratën e tij dhe ne jemi të kënaqur me punën e tij. Siç thashë, do të shohim se cili është buxheti ynë, për çfarë turne jemi të kualifikuar. Nuk është e lehtë të mbash librat e ekuilibruar dhe gjithashtu të sigurosh një skuadër me cilësi, kështu që ne duhet të presim për këtë”, ishte përgjjgja e tij.

Juventusi është i treti në tabelë me 64 pikë të grumbulluara. /Gazeta Express/