Donika Kadaj lajmërohet nga Mitrovica pas raportimit se serbët shkrepën me armë afër saj

Lajme

Gazeta Express

09/05/2021 11:42

Ish-deputetja e Kosovës, Donika Kadaj, është raportuar se është në mesin e një grupi kosovarësh prej 50 personash nga “Kosovo Mountain Club” të cilët kanë dalë për ‘hiking’ në veri të Kosovës. Ata e kanë ndërruar drejtimin e ecjes, pasi në zonën e Zubin Potokut kanë hasur në dy persona të panjohur, të cilët kanë shtënë me armë zjarri, raporton Express.

Kadaj është lajmëruar nga Mitrovica me një fotografi të postuar në facebook.

Nga ky incident nuk është lënduar asnjë person, ndërsa detaje për rastin ka dhënë një nga zyrtarët e këtij klubi për Gazetën Express.

“Grupi ka qenë duke bë hiking (ngjitje), në malet mbi liqenin e Ujmanit, dy persona kanë shkrep përpjetë me armë zjarri, pas kësaj grupi ka marrë vendim me u kthy. Kanë qenë pjesëmarrës rreth 50 persona në grup, nuk ka të lënduar, grupi është në rregull. Grupi ka vazhdu me ecë për në Shalën e Bajgorës”, tha njëri nga ta për Express.

I pyetur nëse rastin e kanë raportuar në polici, ai tha se rastin e kanë lajmëru në policinë e Zubin Potokut, dhe policia atje paraprakisht kanë qenë të njoftuar me email për ecjen e grupit në atë zonë.

“Incidenti ka ndodhur diku rreth 30 metra largësi, grupi vazhdon me ecë”.

Express ka kontaktuar me policinë Rajonale të Mitrovicës dhe me Prokurorinë, por kanë thënë se nuk kanë informacione për rastin. /Express/