Dhjetë fakte për jetën e Bilbilit Nexhmije Pagarusha

Gazeta Express

07/02/2020 11:32

Me rastin e vdekjes së Bilbilit të Kosovës, më poshtë po japim disa detaje që ndoshta nuk i keni ditur për të më parë!

1.Nexhmije Pagarusha ikona e muzikës shqipe, është e njohur si një grua e cila gjatë gjithë karrierës së saj i ka shërbyer me nder dhe dashuri atdheut të saj përmes artit.

Ajo asnjëherë nuk ka pranuar të këndojë diçka që i tejkalon vlerat tona e të lërë pas dore muzikën e mirëfilltë shqipe, këtë më së miri e dëshmon anulimi i një koncerti në Maqedoni, ku i është kërkuar të këndojë në gjuhën serbe dhe zonja Nexhmije është larguar nga skena dhe nuk ka kënduar fare.

Nexhmie Pagarusha ka përfunduar shkollën e muzikës në Beograd dhe gjatë gjithë karrierës së saj artistike ka performuar në koncerte në vende të ndryshme të botës, duke e bërë kështu Kosovën të njohur kudo që ka hedhur hap. Në vitet e rinisë Nexhmija ka kënduar vepra të përkthyera nga Bethoven, Verdi e shumë emra të mëdhenj.

2. Ajo edhe konsiderohej si një grua shumë e saktë. Ajo, gjatë kohës sa ishte nëpër turne nuk ishte vonuar kurrë, madje as në prova nuk ishte vonuar asnjëherë.

3. Gjatë gjithë karrierës së saj ka kënduar mbi 150 këngë

4. Kënga më e njohur e saj është “Baresha”, të cilën e ka kompozuar burri i saj Rexho Mulliqi.

5. Nexhmija është krahasuar me yjet më të mëdha botërore, sa ishte në shkollë në Beograd, madje atë e kanë krahasuar me zërin e rrallë francez Zhyliet Greko. Po ashtu profesorët e shkollës së muzikës kanë thënë se është ofendim ta krahasojmë Nexhmijen me ndonjë emër tjetër, sepse zëri i saj është i rrallë.

6. Përveç muzikës ajo ka qenë edhe aktore. Ka luajtur në shumë filma dhe është cilësuar nga regjisorët si një aktore e përkryer.

7. Ka mbajtur koncerte në vende të ndryshme të botës, si në Izrael, Bullgari, Bosnjë dhe Hercegovinë, dhe në Kosovë e Shqipëri pa dyshim

8. Frika më e madhe e saj ishte aeroplani.

9. Idhulli i saj i përjetshëm ka qenë gjithmonë babai i saj, i cili ishte mësues me profesion, dhe siç ka thënë Tariku, vëllai i saj, gjithmonë iu falënderua atij për suksesin e saj.

10. E ka anuluar një koncert në momentin e parë që ka dalë në skenë në Maqedoni, pasi që publiku ka filluar të bërtasë dhe të mos e lejojë të këndojë shqip. Ata i kanë kërkuar të këndojë në gjuhën serbe por Nexhmija i ka mbyllur perdet e skenës dhe është larguar, duke e refuzuar menjëherë kërkesën e tyre.