Detaje nga laboratori i sofistikuar i falsifikimit në Tiranë

Shqiperi

Gazeta Express

06/07/2025 15:10

Një laborator i fshehtë, i ndërtuar me kujdes dhe i pajisur me të gjitha mjetet për falsifikimin e dokumenteve zyrtare, është zbuluar nga strukturat e Antitrafiqeve në Tiranë. Dy persona, babë e bir, u arrestuan në flagrancë në banesën e tyre në zonën e Tufinës, ku kishin ngritur hapësirën e veçantë të maskuar brenda një dollapi rrobash.

Operacioni zbuloi një mënyrë tepër të sofistikuar funksionimi: hyrja në dhomën e fshehtë realizohej përmes një mekanizmi që aktivizohej duke futur një karikues celulari në një prizë të zakonshme, që shërbente si çelës sekret. Për shkak të këtij sistemi të pazakontë, autoritetet u detyruan të shpërthejnë derën për të hyrë në ambient.

Në këtë laborator, dy të ndaluarit prodhonin pasaporta, karta identiteti, leje drejtimi dhe certifikata pronësie false, të cilat dyshohet se përdoreshin për qëllime kriminale.

Hetimet zbuluan gjithashtu se njëri prej të arrestuarve, Ylli Brahimaj, ishte nën masën e sigurisë “arrest shtëpie”, vendosur më herët nga SPAK për vepra të ngjashme penale. Pavarësisht kësaj, ai kishte vazhduar aktivitetin e paligjshëm nga brenda banesës, duke e kthyer atë në një qendër të mirëfilltë falsifikimi.