Deputetja e VV’së pyet Kohën Ditore: Qysh po përputhet gazetaria e burimeve anonime me interesat e Kadri Veselit - Gazeta Express

Lajme

Gazeta Express

23/05/2020 15:04

Deputetja e VV’së pyet Kohën Ditore: Qysh po përputhet gazetaria e burimeve anonime me interesat e Kadri Veselit

Lajme

Gazeta Express

23/05/2020 15:04

Vetëvendosje ka vazhduar sulmin ndaj “Kohës Ditore” dhe në të njëjtën kohë  kanë thelluar akuzat ndaj Gjykatës Kushtetuese se është e kapur nga Partia Demokratike e Kosovës.

Fitore Pacolli, deputete e VV’së, e ka pyetur gazetarin e “Kohës Ditore” se si po arrin t’i sigurojë burimet brenda Gjykatës Kushtetuese lidhur me vendimin që do të publikohet për mandatarin e Qeverisë së re.

Kjo zyrtare njëkohësisht ka lëshuar akuza se Gjykata Kushtetuese është e kapur nga PDK’ja ndërsa një gazetar i “Kohës Ditore” po arrin të keqe qasje aty.

“Gazetari i cili vete na tregon se GjK qenka e kapur nga PDK, pastaj del me burime te brendshme sipas tij nga GjK. Kah keto burime te brendshme kur GjK qenka e kapur nga PDK?”, ka shkruar Pacolli, në një reagim në FB.

Këto dilema të deputetes së VV’së erdhën pas reagimit të Besnik Krasniqit, gazetar i KD, i cili tha se zyrtarët e VV’së po akuzojnë mediat duke u nisur nga paranoja dhe insinuatat.

Megjithëkëtë, Fitore Pacolli ka thënë se si është e mundshme që gazetaria e burimeve, që po publikohet nga “Koha Ditore” po përputhet me interesat e Kadri Veselit.

“E respektojme punen e pavarur te medias, e sic e tha edhe Liburni, mund te jete teresisht koincidence qe interesat e Kadri Veselit perputhen me ate qe parashikon gazetaria e burimeve anonime”, ka shtuar Pacolli.

Sidoqoftë, Besnik Krasniqi ka kërkuar sqarime nga Vetëvendosje nëse ka gënjyer kur ka prezantuar sondazhe se do të fitojë 50 për qind të votave në zgjedhjet e ardhshme nacionale.

Këtë pyetje Krasniqi e ka bërë pasi një reagimi të LIburn Aliut, i cili ka thënë se gazeta “Koha Ditore’ po bën ‘hulumtime’ që i shkojnë për shtati Kadri Veselit sa i përket vendimit që do të nxirret nga Gjykata Kushtetuese për mandatarin.

Krasniqi ka shkuar edhe më tej duke pyetur zyrtarët e VV’së se mos kanë në plan ta propozojnë Veselin për Shef të Qeverisë pas zgjedhjeve të ardhshme.

“Tash unë nuk po e kuptoj qysh Veseli po u bëka kryeministër, pas zgjedhjeve për të cilat po na thoni se, sipas sondazheve, LVV-ja do t’i fitojë mbi 50 për qind të votave. Na keni gënjyer për rezultatin e sondazhit, apo LVV-ja ka ndërmend ta propozojë Veselin për kryeministër?”, ka pyetur gazetari Krasniqi.

Ndërsa, ka marrë përgjigje nga zyrtarja e VV’së.

“Ne e dime qe do te jemi fitues mbi 50%, por Kadri Veseli shpreson qe jo. Pra, Veseli beson qe VV-ne nuk mundet me e ndale, por shpreson qe ajo nuk do t’i merr mbi 50% dhe mundet me u be ai pastaj kryeminster”, ka shkruar Fitore Pacolli.

Ndryshe, Liburn Aliu ka thënë se në zgjedhjet e ardhshme do të fitojë Vetëvendosje ndërsa PDK do të dalë e dyta e ku Kadri Veseli do të mund të bëhet Kryeministër pasi prapë do të shmanget fituesi.

Ka disa muaj që VV po deklaron dhe publikon sondazhe se në zgjedhjet e ardhshme do t’i fitojë mbi 50 për qind të votave.

Këtë pjesë të statusit të zyrtarit të VV’së e ka zbërthyer Krasniqi.

“Kontradita e madhe me veten ndodhet tek pjesa ku thotë se Veseli “e din që në zgjedhjet e ardhshme fiton LVV por po ashtu beson që PDK del e dyta dhe me këtë Aktgjykim të Gjykatës Kushtetuese, bëhet presedani që i hap rrugën atij për t’u bërë Kryeministër”, ka shtuar ai.

Gazetari i KD ka thënë se Liburn Aliu po shërbehet me paranoja dhe insinuata kur po lëshon akuza në drejtim të gazetës.

“Sulmi i fundit na vjen nga Liburn Aliu, një nga njerëzit kryesorë të Vetëvendosjes në pushtet. Po sulmon, tek po shërbehet me paranoja e insinuata! Statusi i Liburnit shpërfaq akuza ndaj Kohës Ditore dhe një kontraditë me veten. E konteston punën profesionale tonën, kur fjalën hulumim e vë në thojëza. E, na vë në rolin e propaganduesit të Kadri Veselit, kur thotë se po shkruajmë për atë që kreu i PDK-së do”, ka shkruar Krasniqi.

Liburn Aliu, deputet i VV’së, ka shkruar sot një reagim në formë akuze se “Koha Ditore” po shkruan dhe po ‘hulumton’ çështjen e Dekretit të Presidentit në formën që i përshtatet Shefit të PDK’së, Kadri Veseli.

“Kjo që ka thënë Agron Bajrami, e që po ‘hulumton’ Besnik Krasniqi, është ajo që dëshiron Kadri Veseli. Po, mund të jetë koincidencë”, ka shkruar Aliu, në një reagim.

Koha Ditore ka shkruar ditë më parë se Gjykata Kushtetuese pritet ta shpallë jokushtetues Dekretin e Thaçit për Avdullah Hotin. Në të njëjtën kohë do ta përcaktojë afatin 15 ditor për partinë fituese që ta dërgojë emrin për Shef të Qeverisë prej momentin kur merr kërkesën nga Presidenti.

Liburn Aliu ka thënë se mund të jetë rastësi i gjithë ‘hulumtimi’ i Kohës Ditore që i shkon për shtati Kadri Veselit.

“Kadri Veseli dëshiron që Gjykata Kushtetuese ta godas edhe Thaçin edhe Lëvizjen VETËVENDOSJE! dhe t’ia hap të dytit rrugën për Kryeministër. Ai e din që në zgjedhjet e ardhshme fiton LVV por po ashtu beson që PDK del e dyta dhe me këtë Aktgjykim të Gjykatës Kushtetuese, bëhet presedani që i hap rrugën atij për t’u bërë Kryeministër. E përsëris, po, mund të jetë koincidencë”, ka shkruar ai.

Raportet e VV’së me Kohën Ditore kanë qenë të mira kohëve të fundit. Dikur, Vetëvendosje i kërkonte përgjegjësi Surroit për milionat e fituara, për takimin me Milloshevicin dhe akuzonin këtë gazetë se ka lidhje me pushtetin.

KD, ka shkruar më 22 maj se Gjykata Kushtetuese do t’ia rrëzojë dekretin për mandatarin presidentit Hashim Thaçi, por do t’i hapë rrugë planit të tij për ta bërë një qeveri të re, pjesë e së cilës nuk do të jetë Lëvizja Vetëvendosje, subjekt politik që i ka fituar zgjedhjet. Shtatë gjyqtarë të Kushtetueses janë mobilizuar për të gjetur arsyetime mbështetëse për këtë.

“Një burim në Kushtetuese i ka thënë “Kohës Ditore” të enjten se dekreti me të cilin kreu i shtetit e ka caktuar për mandatar Avdullah Hotin e Lidhjes Demokratike do të shpallet antikushtetues, meqë ai është nxjerrë pa përgjigjen definitive të LVV-së për kandidatin për kryeministër”, shkruan gazeta e themeluar nga Veton Surroi.

Por, Aktgjykimi do të thotë shprehimisht se jodomosdo pas mocionit kundër Qeverisë vendi duhet të shkojë në zgjedhje të parakohshme. Po kështu, do të parashohë edhe mundësinë e bërjes së një qeverie, pa partinë fituese të zgjedhjeve.