Deputetja e BDI-së përkrah kandidaten e AAK-së për deputete

Gazeta Express

02/02/2025 15:08

Deputetja e Bashkimit Demokratik për Integrim në Maqedoninë e Veriut, Diana Toska e ka përkrahur kandidaturën për deputete të Eranda Kumnova Baçit në Kosovë e cila bën pjesë në listën e Aleancës për Ardhmërinë e Kosovës.

“Eranda Kumnova Baçi është drejtoreshë e drejtorisë për arsim në komunën e Gjakovës që nga viti 2021 dhe e ka bërë punën për të cilën është ngarkuar me profesionalizmin më të madh. Ajo ka zhvilluar projekte shumë të rëndësishme në këtë drejtori dhe shkollat e Gjakovës konsiderohen si më të mirat në Kosovë. Një grua kandidate si Eranda, e pastër, pa asnjë aferë korruptive dhe e përkushtuar profesionalisht, i nevojitet shtetit të Kosovës. Unë dua ta shoh Erandën në Kuvend sepse e di që do të jetë zëri i fuqishëm i të gjithë qytetarëve të Kosovës, pa dallim”, ka shkruar Toska.

Kumnova-Baçi e udhëheq Drejtorinë e Arsimit në Gjakovë dhe njihet për reformat dhe ndryshimet e bëra në arsimin gjakovar.

Ajo mban numrin 58 në listën zgjedhore të AAK-së.