Dehari dhe VV i binden aktgjykimit, kthehet votimi i hapur, s’ka vota për Albulena Haxhiun

Lajme

Gazeta Express

20/08/2025 11:28

Lëvizja Vetëvendosje sërish ka propozuar Albulena Haxhiun për kryeparlamentare në vazhdimin e sotëm të seancës konstituive, e cila u mbajt pas aktgjykimit të fundit të Gjykatës Kushtetuese.

Kryesuesi i seancës, Avni Dehari, pasi lexoi rregullat e vendosura nga Gjykata Kushtetuese, ka ftuar përfaqësuesin e Vetëvendosjes për të propozuar kandidatin/en për kryetar të Kuvendit të Kosovës.

Në foltore doli ish-kryetari i Kuvendit, Glauk Konjufca, i cili tha se Haxhiu është kandidatja e Lëvisjes Vetëvendosje për kryeparlamentare.

Haxhiu dështoi sërish të marrë votat e nevojshme, raporton Gazeta Express.

Nga 116 deputetë sa ishin prezentë në sallë, 57 votuan për, 56 kundër dhe tre abstenuan.

Vetëvendosje e propozoi Haxhiun përkundër qëndrimeve të ditura të partive të tjera se nuk do ta votojnë atë për kryeparlamentare.

Haxhiu s’mori mbështetjen e nevojshme të Kuvendit edhe në pesë herët kur emri i saj u propozua në votim të hapur. Ndërkaq, edhe përpjekjet e Vetëvendosjes në disa seanca radhazi që të imponojë votimin e fshehtë dështuan dhe aktgjykimi i Kushtetueses konstatoi se kryesuesi i seancës, deputeti i Vetëvendosjes, Avni Dehari, ka shkelë Kushtetutën.

Tashmë Vetëvendosje nuk mund të propozojë pafundësisht emrin e Haxhiut meqë Kushtetuesja ka vendosur që subjekti më i madh parlamentar ka të drejtë të propozojë emrin e njëjtë deri në tri herë.

Kuvendi është i obliguar të konstituojë legjislaturën e dalë nga zgjedhjet e 9 shkurtit brenda 30 ditëve, duke nisur nga 18 gushti.

Kushtetuesja po ashtu e ka obliguar Vetëvendosjen që të gjejë konsensus dhe të mos e bllokojë konstituimin e Kuvendit të Kosovës.

“Gjykata tashmë, ka theksuar që kjo e drejtë për propozimin e kandidatit për Kryetar/e të Kuvendit përbën njëkohësisht edhe detyrim për grupin më të madh parlamentar për bashkëpunim në mirëbesim dhe konsultim konstruktiv me grupet e tjera parlamentare për të gjetur konsensusin apo kompromisin e nevojshëm dhe se kjo e drejtë në asnjë mënyrë nuk mund të rezultojë në bllokimin e konstituimit të Kuvendit”, thuhet në pikën 145 të aktgjykimit.