Dani Carvajal nuk dorëzohet: Synon rikthimin në Kupën e Botës për Klube

Sport

Gazeta Express

30/06/2025 20:06

Mbrojtësi i Real Madridit, Dani Carvajal, vazhdon të besojë se mund të rikthehet në fushë muajin e ardhshëm për të marrë pjesë në FIFA Club World Cup, pavarësisht një dëmtimi të rëndë që e mbajti jashtë për pjesën më të madhe të sezonit 2024/25.

Reprezentuesi i Spanjës vuajti nga një dëmtim i trefishtë në gju, përfshirë edhe një këputje të ligamentit të kryqëzuar (ACL), por vendosi si objektiv personal rikthimin në aksion gjatë turneut në SHBA. Ai është përfshirë në listën e Xabi Alonso-s për turneun, megjithëse më parë ishte raportuar nga Diario Sport se ai nuk do të rrezikohej nga stafi mjekësor dhe tekniku spanjoll.

Në vend të kësaj, ishte përfolur një plan për ta mbajtur Carvajal jashtë derisa të niste faza përgatitore për sezonin 2025/26, për një rikthim të plotë dhe të sigurt.

Por, në prag të përballjes së Real Madridit me Juventusin më 1 korrik në fazën e 1/16-ave të Kupës së Botës për Klube, Carvajal ka dhënë një mesazh optimist:

“Ndihem shumë mirë dhe tashmë jam rikthyer me grupin. Nuk e di nëse do të jem në skuadër ndaj Juventusit, ndoshta në stol, në dispozicion të trajnerit. Por jam shumë i lumtur,” citohet nga Mundo Deportivo.

“Që nga dita e parë e kam përballuar duke e ditur që ishte një dëmtim afatgjatë dhe që duhej të kaloja fazat një e nga një, pa nxituar — kjo është më e rëndësishmja.”

“Kanë kaluar gati nëntë muaj dhe tani jam gati për të konkurruar. E di që kur të më japin leje, do të jap 100%. Nuk kam frikë dhe nuk më mungon vetëbesimi.”

Ai shtoi gjithashtu se, megjithëse ka nevojë për ritëm garues, po stërvitet prej dy javësh me skuadrën dhe ndien se po e rikthen “shkëndijën”. Ai gjithashtu e vlerësoi lart fleksibilitetin taktik që i ofron skuadrës trajneri Alonso:

“Trajneri i jep skuadrës shumë liri taktike, me Tchouaméni mes dy qendërmbrojtësve. Unë kam luajtur si qendërmbrojtës, mbrojtës i majtë dhe si krah ofensiv. Jam gjithmonë i gatshëm të bëj atë që kërkon ai.”

Me vendosmërinë dhe përkushtimin e treguar, Carvajal është pranë një rikthimi emocionues, në një turne ku Real Madridi synon të shtojë një tjetër trofe në koleksionin e tij.