Dalin pamjet nga ndërtesa ku u përplas avioni me 242 pasagjerë, ishte konvikt mjekësh – raportohet për të plagosur

Lajme

Gazeta Express

12/06/2025 13:45

Një aeroplan pasagjerësh Boeing 787-8 Dreamliner i Air India, i cili u nis nga Ahmedabad për në Londër këtë mëngjes, u rrëzua disa minuta pas ngritjes dhe ra në një ndërtesë për konvikte mjekësh në kampusin e një spitali mësimor. Sipas raportimeve, avioni, fluturimi AI171, mbante 232 pasagjerë dhe 12 anëtarë të ekuipazhit.

“Aeroplani u rrëzua në një ndërtesë që është një konvikt për mjekët”, konfirmoi për mediat zëdhënësi i policisë Jaipal Singh Rathore. Ndërtesa është një konvikt për një kolegj mjekësor që strehon studentë dhe mjekë të rinj që po ndjekin specializimin. Janë publikuar edhe foto që tregojnë pjesën e brendshme të konviktit pas rrëzimit. Shërbimet e shpëtimit po kërkojnë në rrënoja.

Images from inside the building (an undergraduate doctor's medical college hostel building at a teaching hospital) where an Air #India Boeing 787 Dreamliner crashed earlier today in Ahmedabad, Gujarat: pic.twitter.com/MYUFIn0VCr

— The STRATCOM Bureau (@OSPSF) June 12, 2025

Mediat indiane raportojnë se disa mjekë dhe studentë janë plagosur.

Sipas informacioneve fillestare, avioni humbi ekuilibrin menjëherë pas ngritjes dhe u rrëzua në një zonë të populluar të qytetit, vetëm pak kilometra larg pistës. Zjarrfikësit, policia dhe shërbimet e emergjencës mbërritën në vendin e aksidentit brenda pak minutash, dhe autoritetet lokale ende nuk kanë treguar numrin e viktimave ndërsa kërkimi për të mbijetuarit vazhdon.

Aksidenti i ka vënë përsëri në qendër të vëmendjes problemet e sigurisë së Boeing, veçanërisht me 787 Dreamliner, i cili ka qenë nën shqyrtim për vite me radhë për një numër të metash teknike dhe prodhuese – duke përfshirë cilësinë e dyshimtë të nyjeve të trupit të avionit dhe përdorimin e pjesëve të pacertifikuara. Rregullatorë të shumtë ndërkombëtarë kanë nisur hetime dhe punonjësit e Boeing e kanë kritikuar publikisht kompaninë për neglizhencë ndaj procedurave të sigurisë.