CNN: Autoritetet rrisin sigurinë në të gjithë SHBA-në pas sulmeve ndaj Iranit

Lajme

Gazeta Express

22/06/2025 13:54

Autoritetet federale dhe udhëheqësit në disa qytete dhe shtete të mëdha të SHBA po rrisin masat e sigurisë dhe po monitorojnë për kërcënime të mundshme pas sulmeve të SHBA-së ndaj objekteve kyçe bërthamore iraniane.

“Asetet tona janë plotësisht të angazhuara. Mbetemi vigjilentë. Zoti e bekoftë Amerikën, dhe të gjithë ata që e mbrojnë Atë”, shkroi zv.drejtori i FBI Dan Bongino në X.

Sekretarja e Departamentit të Sigurisë Kombëtare Kristi Noem tha, “Ne do të punojmë pa pushim për ta mbrojtur atdheun amerikan”.

Udhëheqësit lokalë dhe organet e zbatimit të ligjit janë gjithashtu në gatishmëri të shtuar.

“Po ndjekim situatën që po zhvillohet në Iran. Nga një kujdes i tepruar, po vendosim burime shtesë në vendet fetare, kulturore dhe diplomatike në të gjithë NYC dhe po koordinohemi me partnerët tanë federalë”, tha Departamenti i Policisë së New Yorkut.

Departamenti i Policisë i Los Angelesit gjithashtu po i shton patrullimet pranë vendeve të adhurimit dhe zonave të tjera të ndjeshme, sipas kryetares së bashkisë Karen Bass.

“Ne do të mbetemi vigjilentë në mbrojtje të komuniteteve tona” tha Bass.

Policia në Washington, DC, do të mbajë një “prani të shtuar” në institucionet fetare, sipas Departamentit Metropolitan të Policisë. Kryetarja e bashkisë Muriel Bowser tha, “Së bashku po monitorojmë inteligjencën dhe, si gjithmonë, u kërkojmë të gjithëve të qëndrojnë vigjilentë”.

Autoritetet dhe udhëheqësit në New Jerseyt, Texasit, Ilinois dhe vende të tjera kanë njoftuar se siguria do të rritet dhe monitorimi i kërcënimeve do të intensifikohet pas sulmeve të SHBA-së.