Çka po ndodh me dialogun Kosovë-Serbi dhe Gjykatën Speciale - Gazeta Express

Çka po ndodh me dialogun Kosovë-Serbi dhe Gjykatën Speciale

Ballina

Gazeta Express

16/12/2019 7:09

Drejtor i Institutit Ndërkombëtar për Studime të Lindjes së Mesme dhe Ballkanit, Zijad Beqiroviq, ka folur për dialogun dhe për Gjykatën Speciale.

Zijad Beqiroviq, drejtor i Institutit Ndërkombëtar për Studime të Lindjes së Mesme dhe Ballkanit, thekson se është krijuar një atmosferë që nuk mbështet vazhdimin e dialogut.

Drejtori i Institutit të Lubjanës tha se ai nuk beson se bisedimet midis Beogradit dhe Prishtinës do të vazhdojnë për të paktën gjashtë muaj.

“Sapo të formohet qeveria e Kosovës, fushatat zgjedhore intensive informale do të zhvillohen tashmë në Serbi, kështu që të paktën në gjysmën e parë të vitit 2020, nuk është e mundur të pritet një vazhdim i dialogut”, ka thënë Beqiroviq për portalin serb “Kosovo Online”, transmeton lajmi.net.

Ai vlerësoi se nisma për “Mini-Shengenin”, ka qenë vendimi më i rëndësishëm për rajonin në 30 vitet e fundit.

“Nëse realizohet, presidenti serb Aleksandar Vuçiq dhe kryeministri i Maqedonisë Veriore, Zoran Zaev, do të jenë heronjtë e kohës sonë. Aleanca në Ballkan e udhëhequr nga konservatori Vuçiq dhe socialdemokrati, Zaev më kujton aleancën e qytetërimeve të filluara në 2005 nga kryeministri i atëhershëm i Turqisë Rexhep Erdogan dhe ai i  Spanjës,  Hose Luis Rodriges Sapatero. Nuk është për t’u habitur, pra, se ekziston një luftë hibride me intensitet të lartë që po luftohet kundër Vuçiqit dhe Zaevit, e cila do të intensifikohet kur afrohen zgjedhjet parlamentare në Serbi dhe Maqedoninë Veriore”, theksoi ai.

Ai ka folur edhe për Gjykatën Speciale dhe për ish-udhëheqësit e UÇK-së që janë ftuar nga kjo gjykatë.

Sipas Beqiroviqit, Gjykata Speciale është një provë për bashkësinë ndërkombëtare dhe se kjo gjykatë nuk është dashur të formohet pasi që Kosova ka sistemin e saj të drejtësisë.

“Shikoni, Kosova ka një gjyqësor kombëtar, një mision të EULEX-it, rasti i Kosovës ka qenë edhe në gjykatën e Hagës. Atëherë pse u ngrit një Gjykatë Speciale dhe një ndjekje penale?. Gjykata Speciale është një provë për bashkësinë ndërkombëtare. Kjo përsëri harxhon paratë e taksapaguesve, kryesisht nga BE dhe SHBA. Kjo përfshin përgjegjësinë individuale të të dyshuarve, ndërsa të dyshuarit e lidhin atë me UÇK-së dhe Kosovën për të portretizuar veten si viktima”, deklaroi Beqiroviq, transmeton më tutje lajmi.net.

Në këtë intervistë, Beqiroviq ka hedhur poshtë mundësinë e disa trazirave të mëdha në Kosovë, pasi të dyshuarit dhe të pandehurit kanë mbajtur peng dhe qytetarë nga frika dhe privimi për gati dy dekada, dhe ndjekja e tyre do të jetë një kënaqësi për shumicën e qytetarëve të Kosovës.

Beqiroviq beson se perspektiva evropiane e Ballkanit Perëndimor është më pak e sigurt se sa ishte disa vite më parë, por që sipas tij, BE-ja duhet të ndryshojë qasjen dhe politikën e saj drejt rajonit dhe zgjerimit.

“Insistimi për kushte të reja mund të bëjë që disa vende të ndryshojnë orientimin e tyre gjeopolitik. Prandaj nuk është për t’u habitur që shumë vende të rajonit po zhvillojnë intensivisht bashkëpunim me vendet e tjera dhe se BE po i shtyn vendet e Ballkanit në “përqafimin” e disa vendeve të tjera dhe sferat e interesit me politikën e tyre të zgjerimit”, theksoi Beqiroviq.