Çfarë po kërkon Lista Serbe nga Qeveria e Kosovës? - Gazeta Express

Lajme

Gazeta Express

21/12/2020 20:01

Çfarë po kërkon Lista Serbe nga Qeveria e Kosovës?

Lajme

Gazeta Express

21/12/2020 20:01

Gazetar: Genc Godanci

Kryeministri Avdullah Hoti tha të hënën se po përpiqen t’i tejkalojnë dallimet me Listen Serbe.

Të enjten që lamë pas priti në takim Listen Serbe.

Por ajo se çka u diskutua mes përfaqësuesve serb nga Kosova dhe presidentit të Serbisë, Aleksandër Vuçiq, nuk u bë e ditur deri pas më shumë se 72 orëve.

Ishte drejtori i të ashtuquajturës Zyrë për Kosovë në qeverinë serbe, Petar Petkoviq, ai i cili këtë të hënë tregoi për konkluzionet e vendimet që i morën në atë takim.

Për herë të pestë me radhë, ne paraqitëm një kërkesë për regjistrim të dy ndërmarrjeve serbe, siç parashihet me marrëveshjen e energjisë nga viti 2013, por gjithashtu duke pasur parasysh konkluzionet e ndërmjetësit të BE-së nga 2015. Nëse do të ishte në kundërshtim me interesat e popullit serb dhe interesat vitale serbe, Prishtina menjëherë do t’i formonte ato, dhe ju mund të shihni se ata vazhdimisht refuzojnë të përmbushin atë që nënshkruan dhe ranë dakord në Bruksel për shtatë vjet e gjysmë.”, tha Petar Petkoviq, drejtori i të ashtuquajturës zyrë për Kosovë në qeverinë Serbe

Për më tepër, subjekti politik që merr direktiva nga Beogradi nuk mori pjesë në seancën e fundit të Kuvendit të Kosovës.

Madje zëvendëskryeministri Goran Rakiq dhe ministri për Kthim dhe Komunitete, Delibor Jevtiq, nuk u panë as në mbledhjen e ekzekutivit që u mbajt mëngjesin e së hënës.

Pikërisht për këto mospajtime brenda koalicionit qeverisës foli edhe kryeministri i vendit, Avdullah Hoti.

Ky tha se po përpiqen ti tejkalojnë këto dallime, por duke mos shkelur Kushtetutën.

“Janë disa çështje që i kemi brenda koalicionit me ta, të cilat po mundohemi t’i zgjidhim vetëm në përputhje me ligjet dhe Kushtetutën dhe marrëveshjet e Brukselit që kemi. Në asnjë formë tjetër, po bëjmë përpjekje, janë duke punuar institucionet përkatëse, besoj që do të tejkalojmë. Nëse arrijmë të tejkalojmë, do të tejkalojmë vetëm sipas ligjeve në fuqi.”, tha Hoti.

Po cka po kërkon Lista Serbe me të cilën nuk po pajtohet Hoti?!

Lista serbe, sipas analistit Mushkolaj, është e njohur për të tilla shantazhe.

Imer Mushkolaj thotë se është më mirë që qeveria Hoti të bie sesa të pranoj t’u nënshtrohet kërkesave të Listës Serbe.