Buzëqeshje, duartrokitje, këngë dhe pankarta – Wolves e Liverpool bashkë në nderim të Diogo Jotas

Futboll

Gazeta Express

04/03/2026 12:27

Në ndeshjen e Premierligës mes Wolverhamptonit dhe Liverpoolit, e cila u zhvillua në “Molineux Stadium”, tifozët e të dy skuadrave u bashkuan në një moment emocionues respekti për Diogo Jotan, ish-sulmuesin që e pati një karrierë të shkurtër por të paharrueshme te të dy klubet, përpara se të ndërronte jetë tragjikisht në një aksident automobilistik vitin e kaluar.

Në minutën e 18-të të ndeshjes, një duartrokitje e gjatë përkujtimore shpërtheu në stadium — një referencë kjo për numrin e fanellës që Jota e mbante te Wolves — dhe tifozët e Liverpool menjëherë iu përgjigjën me të njëjtin respekt.

Në minutën e 20-të, mbështetësit e të dyja ekipeve u ngritën sërish në këmbë për ta nderuar Jotan, duke e kujtuar numrin e tij ikonik te Liverpooli, shkruan “Gazeta Express”.

Në tribunat e “Molineux” u shfaq edhe një banderolë e madhe përkujtimore, që e shfaqte fytyrën e Jotas me mesazhin “Nga errësira lind drita” në anglisht, një mënyrë simbolike për ta kujtuar ndikimin e tij të thellë te fansat dhe komuniteti futbollistik.

“Faleminderit Diogo, përgjithmonë numri ynë 20”, shkruante në pankartën e tifozëve “Reds”.

Përtej duartrokitjeve, atmosfera ishte e mbushur me këngë dhe skena emocionuese, me tifozët që mbanin në duar kartonë që përzienin ngjyrat e të dy klubeve dhe fytyrat e Jotas, duke shfaqur një njësi unike respekti dhe dashurie për lojtarin që dha shumë për të dy ekipet.

Trajneri i Wolves, Rob Edwards, u pa gjithashtu duke iu bashkuar duartrokitjeve të tifozëve në nderim të Jotas gjatë minutës së homazheve — një gjest që u mirëprit me respekt nga tifozët e të dy skuadrave. /Gazeta Express