Bushati: Me vullnetin për nënshkrim Kosova ndihmoi partnerët që kanë mendime të gabuara për Serbinë - Gazeta Express
string(98) "bushati-me-vullnetin-per-nenshkrim-kosova-ndihmoi-partneret-qe-kane-mendime-te-gabuara-per-serbine"

Lajme

Gazeta Express

19/03/2023 10:56

Bushati: Me vullnetin për nënshkrim Kosova ndihmoi partnerët që kanë mendime të gabuara për Serbinë

Lajme

Gazeta Express

19/03/2023 10:56

Ish ministri i Jashtëm i Shqipërisë, Ditmir Bushati, ka reaguar pas arritjes së marrëveshjes mes Kosovës e Serbisë mbrëmë në Ohër.

Ai ka thënë se refuzimi i Serbisë për ta nënshkruar këtë marrëveshje nuk dëshmon përkushtim të njimendtë në këtë proces, ndërsa shton se Kosova dëshmoi vullnetin për t’i nënshkruar të dy dokumentet.

Lexo Edhe:

Në këtë mënyrë, Bushati thotë se Kosova i ndihmoi partnerët ndërkombëtarë që “gabimisht mendojnë se përkëdheljet ndaj Serbisë dhe jo rrethimi i saj nga histori suksesi, është rruga e shkëputjes së saj nga Rusia”.

“Takimi i Ohrit mes Kosovës e Serbisë i ndërmjetësuar nga Bashkimi Europian përfundoi me miratimin e planit të zbatimit të marrëveshjes të rënë dakord më 27 Shkurt. E përbashkëta e të dy dokumenteve është mungesa e nënshkrimit të tyre. Refuzimi i Serbisë për të nënshkruar nuk dëshmon përkushtim të njimendtë në këtë proces. Krejt ndryshe u soll Kosova duke dëshmuar vullnetin e saj për të nënshkruar të dy dokumentet. Në këtë mënyrë, Kosova ndihmoi edhe partnerët ndërkombëtar që gabimisht mendojnë se përkëdheljet ndaj Serbisë dhe jo rrethimi i saj nga histori suksesi, është rruga e shkëputjes së saj nga Rusia”, ka shkruar Bushati.

Dakordimi që angazhimet e të dy palëve në këtë proces të trupëzohen në rrugën e tyre drejt BE-së, Bushati vlerëson se do të krijojë sinergji më të mirë mes procesit të dialogut dhe procesit të anëtarësimit të Kosovës dhe Serbisë në BE .

“Përkundër pritshmërive, plani i zbatimit është edhe më i shkurtër se vetë marrëveshja dhe pa shumë detaje, siç ndodh zakonisht në të tillë dokumente. Mirëpo, në Ohër u ra dakord që angazhimet e palëve në këtë proces të trupëzohen në rrugën e tyre drejt BE-së, çka pritet të krijojë një sinergji më të mirë mes procesit të dialogut dhe procesit të anëtarësimit në BE të Kosovës dhe Serbisë.  Pas mbështetjes unanime të shteteve anëtare të Marrëveshjes së 27 Shkurtit, Plani franko-gjerman zyrtarisht u transformua në një Plan Europian, me mbështetjen edhe të SHBA-ve. Kësisoj, BE-ja nuk është më vetëm në pozicionin e ndërmjetësuesit të dialogut mes Kosovës dhe Serbisë, por edhe e përfshirë drejtpërdrejt në zbatimin e angazhimeve. Proces ky i ndërlidhur me anëtarësimin e Kosovës dhe Serbisë në BE.”

Bushati ka shkruar se me pozicionimin e ri, BE e ka mundësinë e artë që ta përfundojë procesin e shtetësisë së Kosovës, europianizimin e Serbisë dhe anëtarësimin e të gjitha shteteve të Ballkanit Perëndimor në BE.

Sipas tij, mënyra më e mirë për t’iu përgjigjur agresionit rus në Ukrainë, është përmbyllja e pasojave të luftërave në ish-Jugosllavi dhe konsolidimi i projektit europian në një hapësirë gjeografike, që rrethohet nga shtete anëtare të BE-së.

“Nëse në të shkuarën BE-ja ka treguar në jo pak raste mungesë besueshmërie, duke mos iu përmbajtur zotimeve të saj përkundrejt shteteve të rajonit, me këtë pozicionim të ri BE-ja ka mundësinë e artë për të përfunduar procesin e shtetësisë së Kosovës, europianizimin e Serbisë dhe anëtarësimin e të gjitha shteteve të Ballkanit Perëndimor në BE, sa më shpejt që të jetë e mundur. Mënyra më e mirë për t’iu përgjigjur agresionit rus në lindje të kontinentit është përmbyllja e pasojave të luftrave në ish Jugosllavi dhe konsolidimi i projektit europian në një hapësirë gjeografike, që rrethohet nga shtete anëtare të BE-së, siç është Ballkani Perëndimor”, ka shkruar Bushati në Facebook.