Mbretëria e Bashkuar pezullon negociatat tregtare me Izraelin për shkak të bllokimit të ndihmave në Gaza

Lajme

Gazeta Express

20/05/2025 15:59

Sekretari i Jashtëm i Mbretërisë së Bashkuar, David Lammy, i ka thënë parlamentit se Mbretëria e Bashkuar ka pezulluar negociatat tregtare me Izraelin për shkak të bllokadës në Gaza.

Ai tha se për këtë çështje është thirrur ambasadori izraelit.

David Lammy i është drejtuar me disa fjalë në parlament drejtpërdrejt popullit izraelit, shkruan The Guardian, transmeton Gazeta Express.

‘Unë i them tani popullit të Izraelit, dua një miqësi të fortë me ju të bazuar në vlerat e përbashkëta, me lidhje që lulëzojnë midis njerëzve dhe shoqërive tona. Ne jemi të palëkundur në angazhimin tonë për sigurinë tuaj dhe për të ardhmen tuaj, për t’iu kundërvënë kërcënimit shumë real nga Irani, plagës së terrorizmit dhe të këqijave të antisemitizmit, por lufta në Gaza po dëmton marrëdhëniet tona me qeverinë tuaj”.

“Dhe siç ka thënë kryeministri, nëse Izraeli e ndjek këtë ofensivë ushtarake, siç e ka kërcënuar, duke mos siguruar dhënien e papenguar të ndihmës, ne do të ndërmarrim veprime të mëtejshme në përgjigje”.

Ai tha se pavarësisht nga përpjekjet e tyre, veprimet dhe retorika skandaloze e kësaj qeverie izraelite kanë vazhduar.

“Ata po e izolojnë Izraelin nga miqtë dhe partnerët e tij në mbarë botën, duke minuar interesat e popullit izraelit dhe duke dëmtuar imazhin e shtetit të Izraelit në sytë e botës”.

Lammy thotë se sanksionet po vendosen ndaj “tre individëve të tjerë dhe katër subjekteve të përfshira në lëvizjen e kolonëve” në Bregun Perëndimor të pushtuar.