“Bravo Eddy”, Juventusi me postim të veçantë nga stërvitja për Edon Zhegrovën

Futboll

Gazeta Express

10/02/2026 19:12

Klubi më i madh italian, Juventusi vazhdon të bëjë postime të veçanta për yllin e kombëtares së Kosovës, Edon Zhegrovën.

Pasi e postoi dje një video të tij nga stërvitja në “instagram”, me mbishkrimin “Luani”, faqja zyrtare e klubit e ka postuar edhe sot një video të tij, kësaj radhe në “Facebook”.

“Bravo Eddy” shkruhet në postimin e Juventusit, mbishkrim që lidhet me një vlerësim që iu dha Zhegrovës gjatë videos.

Në videon e përmbledhur nga klubi, Zhegrova shihet duke treguar aftësitë e tij prej një finisheri të akullt në stërvitje, me ç’rast i mori edhe lëvdatat.

Ndonëse po merr ‘minuta’ në rrjetet sociale të Juventusit, ylli dardan s’po i ka të njëjtat edhe në fushën e lojës.

26-vjeçari ka luajtur në vetëm 18 ndeshje me fanellën e Juventusit, prej të cilave vetëm një si startues, në tetor të 2025-ës. Ai ka luajtur vetëm 374 minuta.

Zhegrova u transferua te Juventusi në ditën e fundit të afatit kalimtar të verës së kaluar, për shumën e 15.5 milionë eurove nga Lille./GazetaExpress/