Bolsonaros së Brazilit s’po i shkon mirë izolimi, kafshohet nga një zog i madh përderisa e ushqen

Gazeta Express

14/07/2020 9:00

Presidenti i Brazilit, Jair Bolsonaro, është parë jashtë rezidencës zyrtare të hënën, ku kishte dalë për t’i ushqyer disa zogj të mëdhenj, që ngjajnë me strucin. Megjithatë, jo gjithçka i shkoi mirë, sepse një fotograf e ka kapur momentin kur njëri prej këtyre zogjve ia kafshon dorën presidentit të famshëm.

Ai doli në kopshtin e pallatit “Alvorada” dhe u dha ushqim zogjve të quajtur rhea, të cilët janë zogjtë më të mëdhenj në Amerikën Jugore, shkruan “Wionews”, transmeton Gazeta Express.

Bolsonaro gati qe një javë është duke qëndruar në karantinë pasi u diagnostikua me koronavirus. Ai të hënën tha se nuk po mund të qëndrojë në izolim dhe se do ta bëjë edhe një test tjetër. Presidenti ka thënë se është duke u ndier mirë dhe meritat për këtë ia ka lënë trajtimit me hidroksiklorokinë, një ilaç që nuk është dëshmuar shkencërisht për efektet kundër koronavirusit.

“Rezultatet e testit duhet të dalin për disa orë dhe do të pres goxha me ankth, sepse nuk po mund ta duroj këtë rutinën e qëndrimit në shtëpi. Është e tmerrshme”, tha Bolsonaro në një intervistë.

Duket se as diagnostikimi me koronavirus nuk ia ka ndryshuar mendjen Bolsonaros për rrezikun që paraqet sëmundja e re, të cilën më parë e ka përshkruar si grip të vogël dhe më parë ka thënë se dëmi ekonomik nga masat e izolimit është më i madh se vet virusi.