Binaj: Do të kandidoj për kryebashkiak të Tiranës kurdo që të mbahen zgjedhjet

Shqiperi

Gazeta Express

04/11/2025 11:47

Kandidati i pavarur për bashkinë e Tiranës, Florjan Binaj, ka reaguar sot pas vendimit të Gjykatës Kushtetuese ku u vendos rrëzimi i shkarkimit të kryebashkiakut të arrestuar, Erion Veliaj.

Në një postim në rrjetet sociale, Binaj shprehet se “Tirana ka nevojë për ndryshim”. Ai thekson se do të jetë kandidat për të drejtuar bashkinë, kurdo që zgjedhjet të zhvillohen.

“Për mua dhe për qytetarët e Tiranës thelbi mbetet i njëjtë: Tirana ka nevojë për ndryshim. Unë do të kandidoj për kryebashkiak të Tiranës kurdo që të mbahen zgjedhjet me të njëjtën bindje, përkushtim dhe energji për t’u shërbyer njerëzve me ndershmëri, përgjegjshmëri dhe transparencë”, tha ai.

“Kjo nuk është garë për pushtet, por përpjekje për qytetin tonë, për ta bërë atë shtëpinë që duam t’u lëmë fëmijëve tanë. Mbështetja, inkurajimi dhe besimi që më kanë dhënë mijëra qytetarë këto ditë më kanë bindur se së bashku ne do t’ia dalim. Rrugëtimi ynë vazhdon. Ndryshimin që duan qytetarët e Tiranës nuk do ta ndalë asgjë”, përfundoi Binaj.