BE ndan mbi 500 milionë euro për kërkime shkencore, kritika drejt ShBA-së

Lajme

Gazeta Express

05/05/2025 16:53

Në një përgjigje ndaj administratës Trump për ndërprerjet e financimit të hulumtimeve dhe ndryshimeve në shkencë, një zyrtar i lartë ka njoftuar se Bashkimi Europian do të shpenzojë mbi 500 milionë euro për “ta bërë Europën një magnet për shkencëtarët”.

Ndërsa, presidentja e Komisionit Europian, Ursula von der Leyen dhe presidenti francez Emmanuel Macron folën në ngjarjen “Zgjidh Europën për Shkencën” të mbajtur në Universitetin prestigjioz Sorbonne në Paris, Macron kritikoi drejtpërdrejt veprimet e fundit të ShBA-së për anulimin e granteve kërkimore.

“Askush nuk mund të kishte imagjinuar disa vite më parë që një nga demokracitë më të mëdha të botës do të anulonte programet kërkimore thjesht sepse fjala ‘diversitet’ ishte në program,” u shpreh Macron.

Ndërkohë, von der Leyen u shpreh se ishte “jashtëzakonisht gabim”.

“Fatkeqësisht, ne po shohim se roli i shkencës në botën e sotme është vënë në dyshim. Investimi në kërkimin themelor, të lirë dhe të hapur është vënë në dyshim. Çfarë llogaritje jashtëzakonisht e gabuar,” tha presidentja e Komisionit Evropian, në një fjalim që nuk përmendi Shtetet e Bashkuara.

Komentet e Macron dhe von der Leyen vijnë pas shumë ndryshimesh në politikën shkencore të ShBA-së, që nga rikthimi i Trump-it në Shtëpinë e Bardhë.

Kujtojmë se muajin e kaluar, Fondacioni Kombëtar i Shkencës, një agjenci federale e ngarkuar me përparimin e zbulimeve në spektrin shkencor, njoftoi se do të anulojë qindra grante për programe që përfshijnë kërkime lidhur me diversitetin, barazinë, “integritetin e informacionit mbi vaksinën,” dezinformimin dhe keqinformimin.

Në faqen e Fondacionit u tha se do të ndalohet financimi i çdo hulumtimi mbi dezinformim, gjë që është e kundërta e urdhërit ekzekutiv të 20 janarit nga Trump, për “rikthimin e lirisë së fjalës”.

Përveç kësaj, në një propozim buxheti të zbuluar javën e kaluar nga Shtëpia e Bardhë përfshihet edhe një ulje e madhe e financimit për ndryshimet klimatike dhe eliminimi i një institucioni që ka në fokus kërkimet për infermierinë.