BDI reagon për ndërtimet pa leje në Çair, ngrit shqetësime për përfaqësimin politik

Maqedoni

Gazeta Express

04/06/2025 12:14

Bashkimi Demokratik për Integrim ka reaguar ashpër ndaj zbulimeve të fundit lidhur me ndërtimet pa leje në komunën e Çairit, duke e cilësuar këtë si provë të re të lidhjeve të ngushta midis koalicionit VLEN dhe partisë VMRO-DPMNE.

Sipas një kumtese të lëshuar nga partia, ndërtimi i mbi 150 objekteve pa leje, pa standarde statike e sizmike dhe jashtë çdo kontrolli institucional, përbën një rrezik serioz për qytetarët dhe një akt të pastër të krimit urban.

“Zbulimi i aktiviteteve të paligjshme të udhëheqësisë së VLEN, si pjesë e të ashtuquajturës ‘Krimi Urban’, vetëm sa vërteton atë që e kemi denoncuar që në fillim,” thuhet në reagimin e BDI-së, ku akuzohet VMRO-DPMNE se ka zgjedhur partnerët shqiptarë në bazë të shantazhit dhe kontrollit përmes dosjeve penale.

BDI gjithashtu e konsideron këtë situatë si një përpjekje të qëllimshme për të dëmtuar barazinë ndëretnike dhe për të minuar Marrëveshjen e Ohrit, duke paralajmëruar se shqiptarët nuk do të pranojnë një “farsë përfaqësimi” me njerëz që, sipas tyre, janë të përulur nga frika e ndjekjes penale.

Partia mbyll deklaratën me akuzën se kjo është një pjesë e axhendës antieuropiane dhe antishqiptare e Qeverisë së re, e udhëhequr nga VMRO-DPMNE dhe aleatët e saj.