Bashkëpunimi i mundshëm për blerje armatimi me Shqipërinë dhe Kroacinë, ministri kroat e sheh si “të vështirë” për Kosovën

Lajme

Gazeta Express

03/09/2025 9:27

Ministri i Mbrojtjes së Republikës së Kroacisë, Ivan Anushiq, ka folur për deklaratën e ministrit të Mbrojtjes së Kosovës për një bashkëpunim të mundshëm trepalësh në fushën e blerjes së armatimit me Shqipërinë dhe Kroacinë, Anushiq e bëri të qartë se një marrëveshje e tillë mund të ndodhë vetëm mes Kroacisë dhe Shqipërisë, pasi të dyja janë anëtare të NATO-s.

“Kosova ka kushte të tjera për blerjen e armëve dhe është vështirë të formohet një koalicion i përbashkët për blerje me të tria shtetet,” theksoi ai, raporton Vijesti.

Muajin e kaluar u raportua se Kosova, Shqipëria dhe Kroacia po punojnë për ta konkretizuar në praktikë bashkëpunimin në fushën e mbrojtjes për të cilin u dakorduan në letër para rreth pesë muajsh, kur ministrat e Mbrojtjes nënshkruan një deklaratë të përbashkët më 18.03.2025 në Tiranë.

Ministritë e Mbrojtjes nga Kosova dhe Shqipëria kishin konfirmuar se grupe të ekspertëve po punojnë për planin e zbatimit të deklaratës.  Në Tiranë ishte mbajtur takimi i grupit zbatues “për ta zbërthyer planin në nivel operacional”.

Nga Ministria e Mbrojtjes e Shqipërisë, e cila ishte mikpritëse e ceremonisë së nënshkrimit të marrëveshjes, thanë se në shtator të këtij viti do t’u paraqitet për miratim ministrive të Shqipërisë, Kosovës dhe Kroacisë udhëzuesi i cili është drejt finalizimit.

Ministri në detyrë i Mbrojtjes, Ejup Maqedonci kishte thënë se synohet që të bëhet një porosi për blerje, në vend të tri porosive të veçanta nga secili shtet.

“Për shembull një sistem [armësh] që jemi të interesuar të tri shtetet ta blejmë nga SHBA-ja, ta bëjmë porosinë si një blerje, duke shfrytëzuar legjislaturën e secilit vend, por që sasia dhe koha e liferimit të determinohet si e përbashkët, sepse prej SHBA-së kur blen më shumë, kushtojnë më lirë dhe vijnë më shpejt”, kishte thënë Maqedonci për Radion Evropa e Lirë.

Këto blerje parashihet të bëhen me fonde kombëtare të secilit shtet.