Bashkëbisedim ndërmjet shkrimtarit Dinko Kreho dhe përkthyesit Qerim Ondozi

Arte

Gazeta Express

21/07/2022 16:10

Në hapësirën 17, të premten, më 29 korrik do të mbahet një bashkëbisedim ne mes të shkrimtarit Dinko Kreho dhe përkthyesit Qerim Ondozi. Ngjarja do të filloj nga ora 18:00 dhe organizohet në bashkëpunim mes ‘Traduki’, ‘Project Space 17’ dhe ‘Qendra Multimedia’.

Dinko Kreho është pjesë e programit të rezidencave për autorë implementuar në bashkëpunim me dhe mbështetur nga Traduki. Përgjatë qëndrimit të tij një mujor në Prishtinë, Kreho ka punuar në përmbledhjen e tij me poezi „Dobri objekti“e cila pritet të botohet këtë vjeshtë.

Në këtë event po ashtu do të flitet dhe do të lexohen pjesë nga libri i tij më i ri.

Kush është Dinko Kreho?

Dinko Kreho është shkrimtar si dhe me raste edhe gazetar, përkthyes e performues teatri. I lindur në Sarajevë më 1986, ai ka jetuar në Sarajevë, Bihaq, Zagreb, Paris dhe Rene. Ka mbaruar studimet për letërsi krahasuese në Universitetin e Sarajevës në vitin 2010. Tashmë jeton në Zagreb dhe është i angazhuar si shkrimtar.
Kreho ka botuar tri përmbledhje me poezi, dy libra publicistikë, një përmbledhje me tregime të shkurtëra dhe një radio dramë të metrazhit të gjatë (kjo e fundit në bashkëautorsi me dramaturgun Dario Bevanda). Ai gjithashtu punon për së afërmi me kolektivin Qendra për Teatrin e të Shtypurve (POKAZ) në Zagreb, ku eksperimentojnë me shkrim kreativ në një ambient bashkëpunues. Përmbledhja e tij e katërt me poezi me titull Dobri objekti [Objektet e mira) do të botohet këtë vjeshtë.

Për „Objekte të mira“

„Objekte të mira“ merr titullin nga nocioni i ‘objekteve të përbrendësuara’ i zhvilluar nga psikoanaliztja Melanie Klein. Objekte të tilla, sipas Klein, janë përshtypje psikologjike dhe emocionale tonat dhe të të tjerëve, imazhe mentale të cilat i bartim në vete dhe drejt të cilave ndërtojmë raporte të caktuara.

Duke u nisur nga ky koncept, Dobri objekti synon të bëjë një hartëzim poetik të frikërave dhe anktheve tona bashkëkohore, por gjithashtu ndjenjave tona të shpresës dhe mallit. Si koncept, ndërtohet mbi teknikat surrealiste të shkrimit, në një përpjekje për të artikuluar përvojën e një bote tejet të rrjetëzuar dhe në të njëjtën kohë tejet të fragmentuar, ku ‘asgjë nuk është private, gjithçka është e privatizuar.

/Gazeta Express