Barcelona njofton rinovimin me Lamine Yamalin – zbulohen detaje nga kontrata e tij e re

Sport

Gazeta Express

27/05/2025 22:09

Barcelona ka zyrtarizuar sot rinovimin e kontratës me yllin adoleshent Lamine Yamal, duke e lidhur afatgjatë me klubin katalanas. Kontrata e re do të hyjë në fuqi në muajin korrik, kur Yamal mbush 18 vjeç, pasi rregulloret aktuale kufizojnë kontratat e lojtarëve nën moshë në maksimum tre vjet.

Kontrata e re e Yamal, e cila skadon në vitin 2031, do ta mbajë atë te Barcelona deri në moshën 23-vjeçare. Edhe pse agjenti i tij Jorge Mendes dhe vetë futbollisti kishin siguruar publikisht se do të vazhdonte te Barça, klubi ka qenë i vendosur që ta përfundojë sa më shpejt marrëveshjen për të shmangur interesimin nga klubet e tjera, përfshirë Paris Saint-Germain, që sipas Drejtorit të Futbollit Deco, kishte shprehur interes gjatë verës së kaluar.

Ndërkohë që Deco mohoi spekulimet se Yamal kishte kërkuar të ishte lojtari më i paguar në skuadër, mediat spanjolle raportojnë se paga bazë prej 8 milionë euro në vit, plus bonuset e ndryshme, mund ta bëjnë atë ndër më të paguarit në klub nëse realizohen objektivat.

Me Ansu Fati që pritet të kalojë te AS Monaco, një tjetër marrëveshje e menaxhuar nga Mendes, Barcelona planifikon t’i dorëzojë Yamal-it fanellën ikonike me numrin 10, duke e bërë jo vetëm lider në fushë, por edhe figurë qendrore në aspektin marketing dhe promovues të klubit.

Që prej debutimit me ekipin e parë në prill të vitit 2023 në moshën vetëm 15-vjeçare, Lamine Yamal ka regjistruar 106 paraqitje, 25 gola dhe 34 asistime. Verën e kaluar, ai pati një rol kyç në triumfin e Spanjës në Euro 2024, ndërsa kohët e fundit u bë lojtari më i ri në histori që arrin 100 ndeshje me Barcelonën – duke konfirmuar statusin e tij si një prej lojtarëve më të mirë në botë për momentin.