Barcelona e zyrtarizon transferimin e Marcus Rashfordit

Sport

Gazeta Express

23/07/2025 19:02

Barcelona ka konfirmuar zyrtarisht atë që prej kohësh ishte një sekret i hapur: nënshkrimin me Marcus Rashford. Sulmuesi anglez i bashkohet katalanasve nga Manchester United në formë huazimi njëvjeçar, me një opsion blerjeje të vlerësuar rreth 30 milionë euro.

Lajmi u zyrtarizua pasi Rashford mbërriti në Barcelonë të dielën në mbrëmje. Të hënën, ai u prit nga drejtuesit e klubit, ndërsa të martën në mëngjes ushtroi në palestër dhe më pas u bashkua me skuadrën për stërvitje. Ai u pa gjithashtu duke xhiruar një video prezantimi në distancë. Rashford do të mbajë fanellën me numrin 14.

Edhe pse një transferim ishte përfolur që në janar dhe lidhjet me Barcelonën kanë qenë të vazhdueshme, brenda klubit ka pasur dyshime për lojtarin. Fillimisht, Barça kishte tentuar të afronte Luis Diaz dhe më pas Nico Williams, por më në fund u orientua te Rashford si një opsion më i përballueshëm financiarisht.

Drejtori sportiv Deco thuhet se mbetet i pavendosur për këtë lëvizje, por trajneri Hansi Flick e dëshironte me ngulm, duke ndjerë se sulmit i nevojitej një alternativë shtesë. Flick ka zhvilluar një bisedë me Rashford të enjten, përpara se marrëveshja të përfundonte, duke i bërë të qartë se do të kërkonte më shumë përkushtim në aspektin mbrojtës – pikërisht zona që ka ngritur më shumë pikëpyetje për yllin anglez.

Rashford, i cili raportohet se ka qenë i dëshiruar për një transferim në “Camp Nou”, ka pranuar sfidën e Flick. Ai pritet të luajë kryesisht në krahun e majtë të sulmit, duke ofruar një alternativë për Raphinhan.