Ishte një nga banorët më të moshuar amerikanë që ka jetuar deri më sot në Pragë. Ndonëse kishte lindur në Chicago të Shteteve të Bashkuara, një takim me gruan e tij të ardhshme, Zdenka Najmanová, do të bëhej përcaktues për fatin e tij jetësor.
Gene Deitch do të vendosej në Pragë prej nga e gjithë veprimtaria e tij prej krijuesi do të bënte emër, edhe si fitues i një çmimi “Oscar” për animacion, ashtu si edhe për regjinë e filmave vizatimorë të Tomit dhe Jerryt, si dhe Popeyet për tregun amerikan. Bashkë me të shoqen ishte pjesëmarrës i rregullt në festivalet çeke të animacionit, ku të dy u nderuan për punën dhe kontributin e tyre në animacionin çek, shkruan sot Koha Ditore.
Të enjten animatori amerikano-çek ka vdekur në moshën 95-vjeçare. Botuesi i tij çek, Petr Himmel, e ka ndarë lajmin e pikëlluar për “Associated Press” duke konfirmuar se ai ka ndërruar jetë “papritur” mbrëmjen e së enjtes në apartamentin e tij në kryeqytetin çek. Sipas një fqinji të animatorit, shkaku i vdekjes nuk lidhet me koronavirusin.
Edhe të hënën kanë vërshuar mijëra homazhe për yllin e shuar – emri i vërtetë i të cilit ishte Euegene Merrill Deitch
“Ai lulëzoi në animacion, duke e trasuar rrugën e tij në një kohë (vitet ’40 e ’50) kur krijimi i filmave të tillë ishte i kushtueshëm dhe pajisjet të palëvizshme. Në një kohë kur vetë industria (vitet ’60 e ’70) po venitej, Gene ishte mbështetës i palëkundur dhe avokat i zejes”, ka shkruar producenti i animacionit, Jerry Beck.
Duke e përshkruar si entuziast për jetën, artin e muzikën e jazzit, sipas tij, Gene e përvetësonte teknologjinë e fundit nga incizuesit e kasetave në fillim të viteve ’50 deri te interneti në fillim të këtij shekulli.
Një nga postimet e fundit të të ndjerit në Facebook ishte bash për koronavirusin.
Ai kishte shkruar të mërkurën: “Shumica e neve të moshuarve ende po ia dalim të jetojmë në çerekun e parë të këtij shekulli të turbulluar, shpesh i konsideruar të jetë i njëzetenjëti, befasisht jemi të shtrënguar të mendojnë mbi atë çfarë është realiste, jashtë koncepteve të mëparshme komerciale të futuristëve industrialë. Vetëm për një gjë, parashikimi im është se deklarata e radhës për modën do të jetë një ringjallje e maskave mesjetare të fytyrës; këtë herë me kuptime mjekësore duke u ndërthurur me setin e fanellave apo bluzave, rikthimi i xixave floreshente, elektrike, maska fytyre me deklarata muzikore e të pacipa, deklarata të nxehta që migrojnë nga fanellat me gjinj deri te frymëmarrja. Prisni për të! Tragjedia sigurisht mund të monetarizohet!”
Çdo shtëpi është një hapësirë që duhet të jetë komode dhe e organizuar, për të lehtësuar jetën tonë të...