ATK: Kush merret me kriptovaltua dhe fiton nga to, duhet të paguajë tatim

Lajme

Gazeta Express

25/03/2026 12:14

Administrata Tatimore e Kosovës (ATK) ka rikujtuar se të gjitha të ardhurat e realizuara nga kriptovalutat konsiderohen të tatueshme dhe duhet të deklarohen në përputhje me legjislacionin në fuqi.

Përmes një njoftimi, ATK u bën thirrje personave fizikë jo afaristë, personave fizikë afaristë dhe personave juridikë që të deklarojnë dhe paguajnë tatimet në mënyrë të saktë dhe brenda afateve ligjore.

Institucioni thekson se aktivitetet e tij do të fokusohen te personat që nuk deklarojnë të ardhurat dhe nuk përmbushin obligimet tatimore, me theks të veçantë në identifikimin e atyre që realizojnë fitime nga kriptovalutat.

Sipas ATK-së, mënyra e tatimit varet nga statusi i tatimpaguesit. Personat fizikë, qofshin afaristë apo jo, duhet t’i referohen Ligjit për Tatimin në të Ardhurat Personale, ndërsa personat juridikë Ligjit për Tatimin në të Ardhurat e Korporatave.

ATK rithekson se mosdeklarimi i të ardhurave përbën shkelje ligjore dhe paralajmëron masa ndaj të gjithë atyre që nuk respektojnë detyrimet tatimore.