Ata që vranë gratë i priti burgimi i përjetshëm

Lajme

Gazeta Express

05/12/2020 23:31

Gjykatat në Kosovë kanë shtuar rastet e shqiptimit të dënimit me burgim të përjetshëm.

Më 25 korrik të këtij viti, në Berivojcë të Kamenicës, Nuhi Mavrovqani vrau gruan e tij, duke e goditur disa herë më shufër metalike.

Për këtë vepër penale, 42 vjeçarit një ditë më parë ju shqiptua dënimi me burgim të përjetshëm, nga Gjykata Themelore në Gjilan.

Mavrovqani këtë vepër e kishte kryer në prezencën e fëmijëve.

E për t’i larguar fëmijët nga shtëpia ku ndodhi vrasja, Qeveria e Kosovës ka ndarë 20 mijë euro.

Por një rast tjetër përfundoi me fatalitet edhe për vet fëmijët. Pjetër Ndrecaj nga Gjakova, kishte vrarë gruan dhe të bijën e tij, korrikun e vitit 2018.

Të njëjtit fillimisht Gjykata Themelore në Gjakovë, më 2 nëntor 2018, i kishte shqiptuar dënimin me 24 vjet burgim efektiv.

Ndaj këtij vendimi, kishin bërë ankesë të gjitha palët.

Përderisa Prokurori i Shtetit dhe pala e dëmtuar kishin kërkuar burgim të përjetshëm, mbrojtja kishte kërkuar një dënim më të butë.

Por, më 1 mars 2019, Gjykata e Apelit, kishte njoftuar se kishte ndryshuar vendimin e Gjykatës Themelore në Gjakovë dhe Ndrecajn e kishte dënuar me burgim të përjetshëm.

Por, kolegji i Gjykatës Supreme kishte konstatuar se në aktgjykimin e shkallës së parë ishin bërë shkelje esenciale të procedurës penale, e më pas Gjykata e shkallës së dytë kishte kaluar mbi këto shkelje.

Pas kësaj Gjykata Themelore në Gjakovë e dënoi Pjetër Ndrecajn me 24 vjet burgim e 6 muaj burgim për vrasjen e gruas dhe të vajzës së tij.

Me burgim të përjetshëm është dënuar edhe Naser Pajazitaj, i akuzuar për vrasjen e Donjeta Pajazitaj, në vitin 2015.

E trajtimi i këtyre rasteve nga institucionet relevante po shihet si i drejtë.

Sipas avokates Fehmije Gashi Bytyqi, dënimi maksimal vetëdijëson njerëzit për pasojat që i presin nëse kryejnë vepra të tilla penale.

Mirëpo ajo thotë se rastet e dhunës duhet të trajtohen edhe më shumë, pasi që shpesh gjithcka fillon me dhunë.

Ndërkohë rastet e dhunës në bazë gjinore në familje janë rritur për rreth 17% gjatë pandemisë.