Arrestohet francezi pedofil në Marok – përdhunoi 89 djem, njihej si “person i ndershëm dhe bujar”

Lajme

Gazeta Express

19/02/2026 14:42

Jacques Leveugle, 79 vjeç, i njohur për dekada në qytetin maroken Khenifra si “francezi i hollë” që jepte mësime falas dhe organizonte aktivitete për fëmijët, është arrestuar dhe po hetohet në Francë për përdhunimin dhe sulmin seksual ndaj 89 djemve në pesë dekada në disa vende. Ai gjithashtu ka pranuar vrasjen e nënës dhe të tezes së tij të moshuar, sipas Associated Press.

Shumica e abuzimeve seksuale dyshohet se kanë ndodhur në Afrikën e Veriut, ku Leveugle jetoi pjesën më të madhe të jetës dhe njihej si mësues i përkushtuar. Krimet u zbuluan pasi një i afërm gjeti një ditar digjital të tij në USB dhe e dorëzoi te autoritetet.

Në Marok, ai dyshohet për abuzimin e dhjetëra djemve, ndërsa në Algjeri për të paktën dy. Zbulimi ka tronditur komunitetet lokale dhe ka rikthyer vëmendjen te mbrojtja e fëmijëve në rajon, ku aktivistët thonë se abuzimet shpesh mbeten të padeklaruara.

Banorët e Khenifras, ku ai jetonte, e përshkruanin Leveugle si një person të ndershëm dhe bujar, që shpesh ndihmonte fëmijët dhe komunitetin. Disa tregojnë se ai i kishte çuar fëmijët në liqenin Agelmam Agezga dhe i kishte urdhëruar të notonin lakuriq, duke filluar vetë, një akt i papranueshëm në kulturën dhe traditën islame.

Hetuesit francezë po kërkojnë dëshmitarë ndërkombëtarë dhe pritet të udhëtojnë në Marok për të mbledhur prova, ndërsa autoritetet marokene nuk kanë komentuar publikisht. Sipas aktivistëve, profil i tij përputhet me modelet globale të abuzuesve që fitojnë besim duke krijuar një imazh të respektueshëm dhe më pas shfrytëzojnë fëmijët në situata të cenueshme.