Arkitekti i “qytetit sfungjer” Kongjian Yu mes 4 të vrarëve në përplasjen e avionit në Brazil

Lajme

Gazeta Express

25/09/2025 10:50

Përplasja e një avioni të vogël në jugperëndim të Brazilit vrau katër persona, përfshirë arkitektin dhe urbanistin kinez të peizazhit Kongjian Yu, thanë autoritetet braziliane të mërkurën, shkruan CNN.

Aksidenti ndodhi të martën vonë gjatë një përpjekjeje për ulje në një fermë të madhe rreth 100 kilometra nga Aquidauana në shtetin Mato Grosso do Sul, thanë zjarrfikësit.

Yu, i njohur për promovimin e zhvillimit ekologjikisht të qëndrueshëm, po udhëtonte me dy dokumentaristë brazilianë, Luiz Fernando Feres da Cunha Ferraz dhe Rubens Crispim Jr., të cilët po bënin një film mbi zonën e lagunave Pantanal. Të tre humbën jetën bashkë me pilotin Marcelo Pereira de Barros, thanë autoritetet.

Yu ishte i njohur për zhvillimin e konceptit të “qyteteve sfungjer”, me infrastrukturë që mund ta përthithë ujin e shiut për t’i zbutur rreziqet e përmbytjeve dhe për ta përmirësuar klimën urbane.

“Në kohë ndryshimesh klimatike”, shkroi në rrjete sociale Presidenti i Brazilit Luiz Inácio Lula da Silva, “Yu u bë një pikë reference globale me qytetet e tij sfungjer, të cilat bashkojnë cilësinë e jetës dhe mbrojtjen e mjedisit”.

Yu argumentonte se duke krijuar hapësira të mëdha për të mbajtur ujë në qendrat e qyteteve, si parqe dhe liqene të vegjël, reshjet ekstreme mund të përthitheshin, duke ndihmuar në parandalimin e përmbytjeve. Ideja përmendet gjerësisht në planifikimin urban në Kinë, dhe vitet e fundit Yu ka punuar në projekte edhe në vende të tjera, përfshirë Arabinë Saudite dhe Tajlandën.