Arijon Ibrahimovic arrin në Romë, tifozët e Lazios dalin ta presin në aeroport

Futboll

Gazeta Express

12/01/2025 23:59

Talenti i Bayern Munich, futbollisti kosovar Arijon Ibrahimovic, u prit nga tifozët në aeroport e Romës, ndërsa mbërriti për të përfunduar transferimin e tij te Lazio.

Mesfushori kreativ, i cili sapo ka mbushur 19 vjeç një muaj më parë, ka tashmë përvojë në Serie A, pasi ishte në huazim te Frosinone gjatë sezonit 2023-24.

Sonte, kosovari zbarkoi këtë mbrëmje në Aeroportin Fiumicino të Romës, ku u prit nga mediat dhe rreth 50 tifozë të Lazios.

Ai mori shallin e Biancocelesti-t dhe pozoi për fotografi, përpara se të shoqërohej nga përfaqësuesit e klubit, për t’u çlodhur në prag të kontrolleve mjekësore që do të kryhen nesër në mëngjes.

Mendohet se bëhet fjalë për një marrëveshje huazimi me opsion blerjeje për 8 milionë euro, ndërsa Bayern Munich ka të drejtën për një klauzolë riblerjeje të përcaktuar në 20 milionë euro. /GazetaExpress/