Apeli i GJKKO lë në fuqi arrestin me burg për Veliajn

Shqiperi

Gazeta Express

09/06/2025 17:37

Gjykata e Posaçme e Apelit për Korrupsionin dhe Krimin e Organizuar ka vendosur të lërë në fuqi masën e sigurisë “arrest në burg” për kryebashkiakun e Tiranës, Erion Veliaj.

Veliaj, nuk ishte i pranishëm në seancën e sotme gjyqësore, por u përfaqësua nga avokati i tij mbrojtës, Ermir Beta. Nëpërmjet tij, Veliaj kërkoi zbutjen e masës së sigurisë “arrest me burg”, duke propozuar vendosjen e një garancie pasurore, pa përcaktuar një shumë të saktë, por duke ia lënë vlerësimin gjykatës.

Megjithatë, kërkesa u refuzua nga gjyqtari Engert Pëllumbi, i cili vendosi të mos ndryshojë masën, duke konfirmuar arrestin me burg të caktuar më herët nga Gjykata e Shkallës së Parë.

Erion Veliaj ndodhet në paraburgim në Durrës që prej datës 10 shkurt 2025 dhe po hetohet nga SPAK.