Antony pritet ta padisë Ajaxin

Futboll

Gazeta Express

11/01/2025 22:19

Sulmuesi i Man Utd ka marrë masa ligjore kundër ish klubit të tij

Sulmuesi i Manchester United, Antony, ka marrë masa ligjore kundër klubit të tij të mëparshëm, Ajax, sipas raporteve.

Braziliani nënshkroi për United nga gjiganti holandez për një tarifë fillestare prej 85 milionë funte në verën e vitit 2022.

Ai u soll te Old Trafford nga trajneri i tij i mëparshëm në Ajax, Erik ten Hag, dhe pavarësisht disa paraqitjeve inkurajuese në fillim, koha e tij në Manchester nuk ka qenë e suksesshme.

Ai nuk ka nisur asnjë ndeshje në Premier League këtë sezon, me dy startet e tij nën udhëheqjen e trajnerit të ri Ruben Amorim që erdhën në Ligën e Europës dhe Carabao Cup.

Sipas medias spanjolle ABC, klubi i La Ligës, Real Betis, po synon një huazim për 24-vjeçarin pasi shiti anësorin e tyre  Assane Diao te Como.

Po i njëjti burim pretendon se Antony ka refuzuar tashmë një kalim te gjigantët grekë Olympiacos.

Por, ndërkohë që spekulimet për të ardhmen e tij vazhdojnë, burimi holandez Algemeen Dagblad raporton se ai është përfshirë në një betejë ligjore me klubin e tij të mëparshëm, Ajax.

Thuhet se mosmarrëveshja lidhet me gjobat që braziliani mori për mungesën e disa stërvitjeve dhe një ndeshje në Eredivisie para se të përfundonte kalimin e tij te United në vitin 2022.

Raporti pretendon se Antony ka paraqitur një rast arbitrazhi, dhe një zëdhënës i komitetit të arbitrazhit të Federatës Holandeze të Futbollit tha për AD se rasti ka nisur të hënën, më 5 janar në Utrecht.

Thuhet se Antony kërkon që Ajax t’i kthejë paratë, pasi ai beson se gjobat janë vendosur “pajustifikueshëm”.

Ajax refuzoi dy oferta për sulmuesin nga United në verën e vitit 2022, duke e shtyrë lojtarin të shpallte publikisht se dëshironte të largohej nga klubi holandez.

“Që nga shkurti i atij viti, agjentët e mi erdhën në Amsterdam për t’i informuar Ajaxin për dëshirën time për t’u larguar dhe për të vazhduar me sfida të reja”, kishte thënë ai pas transferimit.

“Gjatë muajve të merkatos, takimet vazhduan dhe gjithashtu mora një propozim nga Ajax për rinovimin e kontratës. E bëra të qartë edhe një herë: Dua të largohem”. /GazetaExpress/