Anthony Martial i kërkohet të kërkojë falje nga zyrtarët e klubit, pas transferimit të befasishëm në sekondat e fundit

Futboll

Gazeta Express

21/09/2025 11:19

Ish-sulmuesi i Manchester United e bëri zyrtare lëvizjen e tij të premten.

Anthony Martial është përballur me kritika pasi duket se bëri një kthesë të minutës së fundit lidhur me transferimin e tij më të fundit.

Më herët këtë verë, 29-vjeçari – ish-sulmues i Man Utd – u konsiderua i panevojshëm nga AEK Athina, vetëm një vit pasi ishte bërë një nga lojtarët më të paguar në historinë e Superligës Greke.

Ai u la jashtë skuadrës së AEK për ndeshjen kundër Anderlecht në “play-off”-et e Conference League, pasi kishte luajtur vetëm 31 minuta futboll gjatë sezonit 2025/26.

Pasi u vendos në tregun e transferimeve, klubi meksikan Pumas shfaqi interes të madh për ta sjellë ish-reprezentuesin francez në “Estadio Olímpico Universitario”. Madje, disa raporte sugjerojnë se ata kishin arritur një marrëveshje paraprake me Martial dhe AEK Athinën.

Klubi ishte i gatshëm të paguante 750 mijë dollarë për shërbimet e tij dhe Martial fillimisht duket se pranoi transferimin, por me orë të mbetura nga mbyllja e afatit, ai ndryshoi mendje pasi rivali i ligës, Monterrey, bëri një lëvizje të vonshme.

Presidenti sportiv i Monterrey, Jose Antonio Noriega, tha se Martial kishte disa oferta në tavolinë.

“Ne u informuam nga agjentët e tij se ai kishte shumë alternativa nëpër botë dhe po i analizonte ato,” tha ai.

“Opsioni që e tërhoqi më shumë ishte Monterrey, dhe kjo është arsyeja pse ai është këtu. Domènec Torrent na rekomandoi të lëviznim shpejt për Anthonyn dhe pasi u dakorduam brenda klubit, shtymë fort për ta mbyllur marrëveshjen.”

Ndërkohë, pas skenave, tek Pumas nuk janë aspak të lumtur me situatën.

Eduardo Saracho, drejtori sportiv i klubit, shprehu zhgënjimin e tij duke zbuluar se ata tashmë kishin përgatitur një marrëveshje formale.

“Ne filluam të diskutojmë situatën e Anthony-t javë më parë,” tha ai për kanalin meksikan TUDN. “Hymë në negociata me klubin e tij, ata na lejuan të flisnim me AEK Athinën, kishim disa takime në Zoom dhe telefonata, duke punuar për një marrëveshje.

“Ne arritëm një marrëveshje paraprake, ishte një propozim formal, me shkrim, po përgatitnim gjithçka.

“Dhe pastaj, siç e morët vesh edhe ju, ndodhi kjo heshtje e çuditshme. Arrin në një pikë ku ke marrëveshje në parim, pastaj heshtje, dhe më pas ‘Boom’, del njoftimi nga Monterrey.”

Miguel Mejia Baron, anëtar i ekipit të rekrutimit të Pumas, madje ka pohuar se Martial duhet të kërkojë falje për veprimet e tij.

“Nuk është agjenti ai që vendos, është lojtari,” tha Baron për TUDN. “Nuk e di nëse ishte për shkak të parave – ndoshta ai analizoi situata të tjera dhe kishte çdo të drejtë të merrte vendimin e tij.”

Ai shtoi: “Ndoshta ajo që i mungoi ishte një falje.”

Anthony Martial përse iu bashkua Monterrey

Gjatë prezantimit të tij zyrtar këtë javë, Martial shpjegoi vendimin për t’iu bashkuar skuadrës së Domènec Torrent.

“Njoh shumë lojtarë që luajnë këtu, ndaj ishte një vendim i lehtë për mua,” tha ai. “Doja diçka të re, dhe kjo ishte një mundësi e shkëlqyer për mua. Jam shumë i lumtur që jam këtu.”

Martial shtoi: “Nga ana fizike ndihem shumë mirë sepse stërvitesha çdo ditë kur isha në Athinë, kështu që tashmë ndihem gati. Është e vështirë për shkak të ndryshimit të orës, por jam gati ta ndihmoj skuadrën.” /GazetaExpress/