Ancelotti e mbylli me duartrokitje konferencën e fundit si trajneri i Realit, e konfirmoi edhe pasardhësin e tij

Sport

Gazeta Express

23/05/2025 17:41

Trajneri i Real Madridit, Carlo Ancelotti, u përshëndet me duartrokitje nga salla e konferencave në Valdebebas pas konferencës së tij të fundit për shtyp si drejtues i klubit. Italiani u shfaq i qetë dhe i lumtur teksa hodhi një vështrim pas në periudhën e tij të dytë në krye të “Los Blancos”, duke marrë një homazh të rrallë për një trajner në ndeshjen e fundit.

Pavarësisht sezonit të vështirë dhe me tensione në “Santiago Bernabéu”, atmosfera në klub ka ndryshuar me pritshmëritë për një epokë të re që po nis këtë verë. Ancelotti ndjeu dashurinë në ditët e fundit si trajner i Real Madridit:

“Kur mbyllet një epokë, ka shumë emocione, por nuk jam i trishtuar… jam shumë i lumtur sepse po mbyllet një periudhë shumë e rëndësishme. Po largohemi të lumtur sepse e dinim që, herët a vonë, kjo ditë do të vinte. Kam kaluar kohë të shkëlqyera këtu, me shumë dashuri dhe mbështetje. Gjithçka shkoi mirë, një periudhë e gjatë… që përfundoi mirë, me marrëveshje të plotë me klubin.”

Ancelotti theksoi se marrëdhënia me presidentin Florentino Pérez ka qenë gjithmonë e mirë dhe pa asnjë debat, madje u shaka edhe me faktin se kishte përballuar mbi 700 konferenca për shtyp.

Në ndeshjen e fundit kundër Real Sociedad në “Bernabéu”, përveç tij, do të përshëndesë edhe Luka Modric, që largohet si lojtari më i vjetër, golashënuesi më i vjetër dhe kapiteni 39-vjeçar i klubit:

“Është një ditë e bukur dhe emocionale. Jam shumë i ndjeshëm nga natyra. Nëse qaj nesër, nuk do të jetë problem – është një moment i mrekullueshëm. Të përshëndes së bashku me Lukën është një gjë shumë e bukur.”

Përveç kujtimeve të shumta, Ancelotti përmendi netët legjendare të rikthimeve kundër Chelsea, Manchester City dhe PSG si të paharrueshme. Edhe pse largohet për të marrë drejtimin e kombëtares së Brazilit – duke hequr dorë nga ideja që Reali do të ishte stacioni i fundit – ai nuk e sheh veten më në ndonjë klub tjetër:

“Marrëdhënia ime me Madridin do të jetë përjetë. Nuk kam dëshirë të drejtoj ndonjë klub tjetër pas Madridit. Tani dua të bëj mirë me Brazilin, dhe pastaj do të shohim.”

Ancelotti e përshkroi eksperiencën si trajner i Real Madridit si më të lehtën, pavarësisht presionit:

“Këtu është më e lehtë se kudo tjetër, sepse ke gjithçka – cilësinë e lojtarëve, një klub që është rreth futbollit, jo një kompani. Kërkesa për sukses është pjesë e ADN-së së Madridit.”

Në fund, ai konfirmoi se pasuesi i tij do të jetë Xabi Alonso, i cili pritet të prezantohet të hënën si trajner i ri i “Los Blancos”, ndërsa Dean Huijsen dhe Trent Alexander-Arnold pritet të jenë përforcimet e para në epokën e re.