Ambulanca vrau 10-vjeçarin në Kakavijë, reagon PD: E pafalshme që qeveria lejoi krijimin e radhëve të gjata - Gazeta Express

Ambulanca vrau 10-vjeçarin në Kakavijë, reagon PD: E pafalshme që qeveria lejoi krijimin e radhëve të gjata

Shqiperi

Gazeta Express

15/08/2020 16:20

Mbi tragjedinë në Kakavijë, ku ambulanca (teksa po dërgonte në spital një grua që kishte probleme shëndetësore) përplasi për vdekje një fëmijë 10-vjeçar, ka reaguar Partia Demokratike.

“Mendimet dhe lutjet tona janë sot me prindërit dhe familjarët e fëmijës që humbi sot jetën në aksidentin tragjik, në mesin e krizës humanitare të krijuar prej 4 ditësh në pikën kufitare të Kakavijës. Zoti ju dhëntë forcë për ta përballuar dhimbjen dhe këtë humbje të rëndë. Kjo ngjarje e rëndë është një tjetër alarm tragjik për braktisjen e qytetarëve nga qeveria. Është e pafalshme që qeveria lejoi krijimin e radhëve të gjata, dhe nuk informoi qytetarët në kohë”, thuhet në deklaratë.

Më tej deklarohet:

“Është në përgjegjësinë e qeverisë që Shqipëria u shndërrua në zonë të kuqe COVID, pasojë e të cilës është edhe kjo krizë humanitare në kufi. Kjo krizë nuk zgjidhet me propagandë në rrjetet sociale. Nuk zgjidhet me postime virtuale nga rezidencat luksoze qeveritare ku pushon kryeministri, dhe as me xhiro me helikopter dhe rikthim në hotele me 5 yje ku pushojnë anëtarët e kabinetit të tij qeveritar. Zgjidhja e krizës humanitare kërkon angazhimin në nivelet më të larta të qeverisë dhe komunikim të vazhdueshëm me qytetarët shqiptarë. Njerëzit meritojnë të trajtohen me dinjitet nga shteti i tyre.”