Ambasadori francez: Politikanët të shfrytëzojnë orët e pakta para se të përfundojë afati i Kushtetueses nesër

Lajme

Gazeta Express

25/07/2025 15:55

Ambasadori francez në Kosovë, Olivier Guerot, iu ka bërë thirrje deputetëve të Kosovës që të shfrytëzojnë orët e pakta që kanë mbetur para se të përfundojë afati prej 30 ditësh i dhënë nga Gjykata Kushtetuese në qëllim të konstituimit të Kuvendit të Kosovës.

Guerot ishte pjesë e grupit të ambasadorëve që sot shkuan në Kuvend për të marrë pjesë seancën konstituive duke shpresuar se deputetët kosovarë do të shfrytëzonin një nga shanset e fundit për të zbatuar obligimin e tyre kushtetues.

“Së bashku me ambasadorë të tjerë, mora pjesë në seancën e sotme të Parlamentit. Bllokimi aktual po dëmton Kosovën. I inkurajoj të gjithë politikanët që t’i shfrytëzojnë plotësisht orët e pakta të mbetura para se të përfundojë afati i Gjykatës Kushtetuese nesër”.

Ambasadorët e vendeve perëndimore pas seancës shprehën shqetësimet e tyre për ngërçin që s’po zgjidhet në Kuvendin e Kosovës mes paralajmërimeve për pasojat për vendin në mungesë të institucioneve./Express/