Al‑Khelaïfi mbetet i bllokuar në Katar, mungon në ndeshjen PSG – Chelsea

Sport

Gazeta Express

11/03/2026 18:24

Presidenti i Paris Saint‑Germainit, Nasser Al‑Khelaïfi, nuk do të jetë i pranishëm në një nga ndeshjet më të rëndësishme të sezonit për klubin parisien.

Kreu i PSG-së ka mbetur i bllokuar në Doha dhe nuk do të mund ta ndjekë nga afër përballjen e Ligës së Kampionëve kundër Chelseat.

Arsyeja lidhet me situatën e tensionuar në Lindjen e Mesme, përcjell “Gazeta Express”.

Për shkak të konfliktit në rajon dhe kufizimeve të shumta në hapësirën ajrore, shumë fluturime janë ndërprerë ose vonuar, gjë që ka bërë që Al-Khelaïfi të mos mund të largohet nga Katari prej më shumë se një jave.

Mungesa e tij është një situatë e pazakontë për klubin francez.

Presidenti i PSG-së zakonisht është i pranishëm në ndeshjet e mëdha evropiane të skuadrës dhe merr pjesë edhe në aktivitetet përgatitore të ekipit.

Madje, për herë të parë pas shumë vitesh, ai nuk ishte i pranishëm as në seancën e fundit stërvitore të ekipit në kampusin e klubit në Poissy.

Për momentin, drejtuesi i klubit vazhdon ta ndjekë situatën nga Doha dhe po përpiqet ta gjejë një mënyrë për të udhëtuar drejt Parisit, por pasiguria në trafikun ajror e bën shumë të vështirë këtë.

Ndërkohë, drejtues të tjerë të klubit do të përfaqësojnë PSG-në në tribunën e stadiumit për sfidën e rëndësishme kundër Chelseat.

Kështu, përballja e madhe e Champions League mes PSG-së dhe Chelseat do të zhvillohet pa praninë e një prej figurave më të rëndësishme të klubit parisien. /Gazeta Express