Alejandro Balde i rikthehet Barcelonës, por Flick konfirmon se nuk do të luajë nga fillimi

Sport

Gazeta Express

10/05/2025 13:43

Barcelona ka mirëpritur rikthimin e Alejandro Balde dhe Marc Casado pas dëmtimeve në prag të El Clasico-s, por Hansi Flick pothuajse e ka konfirmuar se Gerard Martin do të vazhdojë si titullar në krahun e majtë të mbrojtjes. Ky i fundit pati vështirësi në mbrojtje kundër Interit në Champions League, por shkëlqeu në fazën sulmuese, duke dhënë dy asistime.

Balde ka qenë jashtë fushave për një muaj për shkak të një dëmtimi në muskujt e pasmë të kofshës dhe pasi humbi finalen e Copa del Rey dhe gjysmëfinalen e Champions League, do të rikthehet në aksion kundër Real Madridit. Flick konfirmoi se ai ka të ngjarë të hyjë nga stoli, njësoj si Robert Leëandoëski.

“Nuk mendoj se do t’i aktivizoj që në fillim. Mendoj se Gerard dhe pjesa tjetër e lojtarëve po bëjnë shumë mirë, dhe pas një dëmtimi gjërat janë pak më ndryshe. Pas kësaj ndeshjeje kemi edhe tre të tjera, kështu që duhet të jemi të kujdesshëm. Mendoj se Balde mund të marrë minuta në pjesën e dytë, ai është gati për këtë.”

Blaugranat gjithashtu do të jenë pa Jules Kounde, që do të thotë se Martin dhe Eric Garcia ka gjasa të startojnë. Ky i fundit ka luajtur mirë në krahun e djathtë kundër Interit dhe pritet të bëjë të njëjtën gjë edhe të dielën.

“E shohim që të dy lojtarët janë shumë profesionistë dhe janë përmirësuar shumë që nga fillimi i sezonit. Për mua, kjo nuk është surprizë. Kur e sheh Gerard duke luajtur në gjysmëfinalet e Champions League, ai bëri një lojë fantastike, është e mahnitshme ta shohësh në këtë nivel. Na mungon Balde në këtë situatë, sepse edhe ai ka pasur një sezon të shkëlqyer.”

“Dhe Eric, çfarë mund të them? E dua mentalitetin dhe qëndrimin e tij; është një profesionist i madh. Kur e pyes, ‘Nëse dëshiron të luash si qendërmbrojtës, mbrojtës krahu apo numër gjashtë?’ Ai nuk ka asnjë problem. Ai po bën shumë mirë me topin, por edhe pa të. Dhe gjithashtu mund të shënojë gola, siç kemi parë.”

Barcelona ka surprizuar shumë këtë sezon me linjën e lartë mbrojtëse, një element për të cilin Flick është kritikuar herë pas here, sidomos pas golave të pësuar vonë kundër Interit.

“Kur filluam, filozofia ishte e qartë. Në fillim patëm disa dyshime, sigurisht, por në fund, gjithçka lidhet me ekipin e tërë, jo vetëm me vijën e mbrojtjes. Për ne është e rëndësishme të kemi gjithmonë presion mbi topin. Duhet të dish kush e nis këtë dinamikë dhe kush e ndjek për të rikuperuar topin.”

“Ka pasur ndeshje, sidomos në fillim, ku pamë dyshime, por e ndryshuam atë, dhe ekipi është përshtatur shumë mirë. Ata gjithashtu janë përmirësuar dhe janë të kënaqur me stilin dhe mënyrën si duam të luajmë. Kur sheh cilësinë e lojtarëve, je i lumtur. Kur je trajner dhe sheh intensitet në stërvitje, je i lumtur. Ata punojnë shumë, dhe sot shohim rezultatet.”

Një nga liderët e asaj linje mbrojtëse, ndoshta ai që ka vendosur tonin, ka qenë Inigo Martinez.

“Inigo ka një stil ndryshe. Është një lojtar që pëlqen të luajë më thellë, dhe ai është përmirësuar dhe përshtatur. Është e pabesueshme të shohësh si është përshtatur. Është një lider dhe gjithmonë fokusohet për të fituar çdo ndeshje. Si fokusohet në çdo stërvitje, nëse bëjmë një lojë, ai gjithmonë e fiton atë, dhe si gjithmonë mendon pozitivisht dhe e ndan këtë me lojtarët e tij. Dhe është një luftëtar. Jam i lumtur me të, dhe mund ta them këtë. Mund të jetë një nga sezonet e tij më të mira, dhe nuk është e lehtë. Nuk është e lehtë të bësh këto ndryshime në moshën 32, 33 vjeç.”

Ndërsa Martin nuk do të përballet me Denzel Dumfries në të djathtë në Montjuic, Garcia do të përballet me Kylian Mbappe dhe Vinicius Junior në të majtë, të cilët padyshim do të tentojnë të shfrytëzojnë mungesën e shpejtësisë së tij. Garcia kaloi pjesën më të madhe të ndeshjes kundër Interit duke sulmuar, dhe me Lamine Yamal atje, Federico Dimarco dhe Carlos Augusto ishin kryesisht të zënë me adoleshentin kundër Interit./GazetaExpress/