Aksioni te Njesia e Patentë Shoferëve, Prokuroria: Zyrtarët pranuan ryshfet nga një kandidate dhe ia kaluan testin

Lajme

Gazeta Express

19/05/2025 22:09

Policia e Kosovës në bashkëpunim me Prokurorinë Themelore në Prishtinë ka zhvilluar një aksion në Njësinë e Patentë Shoferëve.

Sipas njoftimit të Prokurorisë, gjatë këtij operacioni janë ndaluar dy persona, nën dyshimet për kryerjen e veprave penale “Marrja e ryshfetit” sipas nenit 421 dhe “Ushtrimi i ndikimit” sipas nenit 424 të Kodit Penal të Republikës së Kosovës.

Të ndaluarit janë zyrtarë publikë, të cilët dyshohet se i kanë kërkuar dhe pranuar para ryshfet nga një kandidate, me qëllim që ajo të kalojë testin praktik të vozitjes. Sipas Prokurorisë, pas pranimit të shumës, kandidates i është mundësuar kalimi i testit.

Ndaj dy zyrtarëve është caktuar masa e ndalimit prej 48 orësh.

Njoftimi i plotë:

Prokuroria Themelore në Prishtinë/Departamenti për Krime të Rënda/Njësiti kundër Krimit Ekonomik dhe Korrupsionit njofton opinionin publik se në kuadër të detyrave dhe përgjegjësive të saj në luftimin e korrupsionit dhe veprave penale kundër detyrës zyrtare, me datë 19.05.2025 ka ndaluar me vendim të prokurorit dy persona për shkak të veprave penale Marrja e ryshfetit nga neni 421 dhe Ushtrimi i ndikimit nga neni 424 i Kodit Penal të Republikës së Kosovës.

Personat e ndaluar janë zyrtarë publikë të cilët dyshohen se me qëllim që viktima të kalojë testin praktik të vozitjes i kanë kërkuar para ryshfet, të cilat i kanë pranuar dhe për shumën e pranuar, kandidatja ka kaluar testin.

Ndaj të dyshuarve është caktuar masa e ndalimit prej 48 orësh, ndërsa brenda afateve ligjore, Prokurori i Shtetit do të ndërmerr veprimet e nevojshme procedurale në grumbullimin e provave.

Prokurori i Shtetit njofton opinionin publik se mbetet i përkushtuar në luftimin e kriminalitetit dhe korrupsionit dhe se do të ndërmerr të gjitha veprimet ligjore për parandalimin e këtyre veprave, si dhe dërgimin para gjykatës të secilit kryes të këtyre veprave penale.