AirPods Max 2: Tingull i shkëlqyer, por i shtrenjtë

AutoTech

Gazeta Express

03/04/2026 22:38

AirPods Max 2 janë kufjet e reja premium të Apple që vijnë me përmirësime të rëndësishme të brendshme, edhe pse nga jashtë duken pothuajse identike me versionin e mëparshëm.

Brenda tyre ndodhet çipi i ri H2, i cili sjell një sërë funksionesh inteligjente si “Adaptive Audio”, “Conversation Awareness” dhe përkthimin në kohë reale – një veçori shumë praktike për udhëtime jashtë vendit.

Për sa i përket cilësisë së zërit, këto kufje ofrojnë një eksperiencë edhe më të mirë se modeli i mëparshëm. Me një amplifikator të ri dhe përmirësim të anulimit aktiv të zhurmës (ANC), tingulli është më i pastër, më i detajuar dhe me bas të fuqishëm. Vendosja është shumë e shpejtë dhe lidhja me iPhone bëhet pa asnjë problem.

Në testime, ato janë krahasuar me modele të nivelit të lartë si Bowers & Wilkins Px8 dhe kanë rezultuar po aq cilësore. ANC i përmirësuar bllokon në mënyrë më efikase zhurmat e ambientit, duke i bërë ideale për udhëtime apo ambiente të zhurmshme.

Një tjetër avantazh është mbështetja për audio “lossless” me cilësi të lartë (24-bit/48kHz) përmes USB-C, si dhe teknologjia “Spatial Audio” që krijon një përvojë më gjithëpërfshirëse dëgjimi. Sistemi gjithashtu përshtat automatikisht tingullin sipas formës së kokës dhe veshëve.

Ndër veçoritë shtesë përfshihen izolimi i zërit gjatë telefonatave, rregullimi automatik i volumit sipas preferencave dhe ambientit, si dhe përkthimi në kohë reale përmes inteligjencës së Apple. Kontrolli përmes “Digital Crown” mbetet një zgjidhje praktike dhe intuitive.

Megjithatë, jo gjithçka është perfekte. Dizajni nuk ka ndryshuar fare dhe ngjyrat janë të njëjta si më parë. Edhe kasa mbrojtëse mbetet e njëjtë dhe vazhdon të kritikohet për mungesë mbrojtjeje të plotë.

Një tjetër minus i madh është çmimi – rreth 499 paund – që është mjaft i lartë, sidomos kur modele konkurruese si Sony WH-1000XM6 apo Bowers & Wilkins Px7 ofrojnë performancë të shkëlqyer me një kosto dukshëm më të ulët.

Në përfundim, AirPods Max 2 janë kufje shumë cilësore me tingull të shkëlqyer dhe veçori të avancuara. Por mungesa e ndryshimeve në dizajn dhe çmimi i lartë mund të bëjnë që shumë përdorues të shikojnë alternativa më të përballueshme. /GazetaExpress/