Ahmed Januzi zgjidhet “Ylli i Javës” në Superligë

Futboll

Gazeta Express

26/05/2025 14:25

Ahmed Januzi ka qenë futbollisti më i mirë i xhiros së fundit të sezonit të rregullt të Superligës.

Kështu të paktën ka vlerësuar Federata e Futbollit të Kosovës.

Sulmuesi vushtrrias ka shkëlqyer në fitoren e fundjavës me rezultat 3:1 ndaj Dukagjinit duke i realizuar dy gola, falë të së cilave Llapi e siguroi barazhin për sivjet duke iu shmangur rënies nga liga.

Ish-përfaqësuesi shqiptar u shpreh i lumtur që u vlerësua më i miri i javës, shkruan “Gazeta Express”.

“Ky vit ka qenë shumë zhgënjyes për ne, sepse kishim ambicie të mëdha: lufta për titull dhe fitorja e Kupës. Nuk ishte një vit i mirë, por sido që të jetë, jemi këtu ku jemi dhe jemi të përqendruar te barazhi. Do ta japim më të mirën për këtë fanellë. Janë shumë faktorë që kanë ndikuar në këtë ecuri, por këto i përkasin së kaluarës. Kampionati i sivjetmë ka qenë shumë më i vështirë se vitet e kaluara, sepse as Llapi nuk është paraparë të jetë në fund të tabelës –por kjo është futbolli. Ndeshja ndaj Vushtrrisë do të jetë një ndeshje shumë e vështirë; do të luaj kundër vendlindjes sime. Normalisht që është kënaqësi të marrësh tituj e trofe, si me klubin ashtu edhe individualisht, dhe këtu kanë meritë edhe bashkëlojtarët, sepse nuk mund të jesh individualist i mirë nëse nuk jemi grup. Uroj që lojtarët e rinj të shpallen më të mirët e javës, sepse kanë ambicie, kanë qëllime, por edhe kanë talent e cilësi –siç është Arianit Hasani”, tha ai për faqen zyrtare të FFK-së. /Gazeta Express