Admirali Dragone vlerëson aftësitë ushtarake të Turqisë, përmend rolin e saj në KFOR

Lajme

Gazeta Express

29/05/2025 9:23

Turqia do të jetë një nga aktorët kryesorë në procesin e paqes midis Rusisë dhe Ukrainës, tha të mërkurën Kryetari i Komitetit Ushtarak të NATO-s, Admirali Giuseppe Cavo Dragone.

Në një konferencë për media pas Konferencës së 18-të të Shefave të Shtabit të Vendeve të Ballkanit, e cila u zhvillua në Komandën e Qendrës Shumëkombëshe të Luftës së Përbashkët në Stamboll, ai tha se armata turke është e dyta në Aleancë.

“Turqia po bën shumë për aleancën. Është Armata e 2-të e aleancës. Prandaj, nuk mund ta shpërfillim këtë. Kjo do të thotë diçka. Dhe gatishmëria dhe përgatitja luftarake, si dhe efikasiteti i forcave të armatosura të Turqisë janë pa dyshim në kulmin e tyre”, tha Dragone, raporton “Anadolu”

Duke theksuar aftësitë operacionale dhe kontributet e Turqisë në misionet e NATO-s, veçanërisht në zonat e konfliktit, Dragone e përshkroi Ankaranë si “një shtyllë të fortë, një referencë të fortë, një aleat të fortë dhe të besueshëm”.

Ai gjithashtu nënvizoi se Turqia është një element themelor i strategjisë së përgjithshme të NATO-s dhe ka kontribuar në mënyrë aktive në Kosovë në kuadër të KFOR-it, të cilin do ta komandojë duke filluar nga tetori.

Pra, siç tha ai, mund të kuptohet ideja se “sa e rëndësishme dhe sa e fortë është Turqia për ne, për aleancën, dhe sa shumë mbështetet aleanca tek Turqia”.

“Kjo është një çështje fakti. Dhe vetëm shembulli i K4 është një nga shumë,” shtoi ai.

“Qëndrimi i NATO-s është i fortë, më lejoni të them më i fortë se kurrë”, tha ai, duke shtuar se aleanca ka dy kërcënime, që janë Rusia dhe grupet terroriste. “Nuk iu konvenon atyre që të na sulmojnë. Pra, strategjia e NATO-s është të jetë gati”, u shpreh admirali Dragone.

Ai theksoi se Turqia ishte një nga të parat që kuptoi rëndësinë dhe aftësinë në rritje të mjeteve ajrore pa pilot, duke shtuar se shumë jetë ka të ngjarë të shpëtohen falë UAV-ve.

Duke iu referuar suksesit të UAV-ve turke, ai tha: “Dronët tuaj janë në majë. Ata janë gjithashtu të provuar në luftime, gjë që është diçka domethënëse”. /Klankosova