Abdixhiku: Vetëvendosjes t’i merret e drejta meqë për 30 ditë s’e përdori, t’i kalojë dikujt tjetër

Lajme

Gazeta Express

23/07/2025 11:54

Kryetari i LDK-së, Lumir Abdixhiku, ka thënë se partia e tij mendon që është e logjikshme që nëse partia e parë fituese s’e përdor të drejtën e saj kushtetuese për të konstituuar Kuvendin, kjo e drejtë t’i kalojë tjetërkujt.

Ai tha se për të vendosur se çka do të ndodhë pas afatit 30-ditor që caktoi Gjykata Kushtetuese për konstituim të Kuvendit i takon sërish Kushtetueses ta përcaktojë, raporton Gazeta Express.

“Në këtë fazë, LDK beson që i ka takuar e drejta dhe përgjegjësia për të bërë shumicë siç e thotë aktgjykimi i Kushtetueses. Nëse i pari për 30 ditë s’arrin ta përmbushë këtë të drejtë, do të ishte e logjikshme, sikurse në rastin e qeverisë, që dikush tjetër të provojë të bëjë një gjë të tillë. Pra, t’i humbet edhe e drejta meqenëse s’po e shfrytëzon një të tillë në bazë vullnetare”.

Ai tha se gjithashtu LDK konsideron që Gjykata Kushtetuese nuk duhet të devijojë nga kapitulli i përgjegjësive sa i përket presidentes.

“Presidentja ka kompetencat e caktuara dhe nuk sheh arsye që të këto kompetenca të zgjerohen as reduktohen në këtë drejtim. Do të jemi të vëmendshëm ndaj vendimit dhe interpretimit të Gjykatës Kushtetuese. E mirëpresim këtë akt dhe presim qartësi”.

Ai tha se vetëm me marrëveshje politike krijohet shumica e më pas institucionet.

“Natyrisht që duhet vetëm marrëveshje politike. Mirëserdhët në demokraci! Kështu bëhen institucionet, me marrëveshje politike. Pra, ulen partitë politike dhe bëjnë marrëveshje. I pari s’ka dashur marrëveshje politike, i pari ka vendosur një proces votimi jokushtetues sepse aktgjykimi i Kushtetueses vendos diçka të tillë dhe i ka shpenzuar 30 ditë, tani i takon Gjykatës Kushtetuese të vlerësojë se çfarë bëhet tutje. Ne po japim një mendim tonin se kjo mund të jetë një rrugë përpara. Meqenëse i pari s’do t’i bëjë institucionet, le t’i merret e drejta sepse s’mund të presim vazhdimisht”.