Abdixhiku: Figura e Bujar Bukoshit do të mbetet përherë pjesë e pandashme e historisë sonë shtetformuese

Lajme

Gazeta Express

10/06/2025 10:41

Kryetari i Lidhjes Demokratike të Kosovës, Lumir Abdixhiku, ka shprehur ngushëllime familjes Bukoshi me rastin e ndarjes nga jeta të ish-kryeministrit në ekzil, Bujar Bukoshi.

Abdixhiku tha se jeta dhe veprimtaria e Bukoshit janë mishërim i përkushtimit atdhetar dhe angazhimit të palëkundur politik për lirinë dhe shtetësinë e Kosovës

“Me dhimbje të thellë morëm lajmin për ndarjen nga jeta të më dashurit tuaj dhe ish-kryeministrit në ekzil, Dr. Bujar Bukoshi. Jeta dhe veprimtaria e tij janë mishërim i përkushtimit atdhetar dhe angazhimit të palëkundur politik për lirinë dhe shtetësinë e Kosovës. Kontributi i tij në momentet më të vështira për vendin tonë është përjetësisht i çmuar”.

Abdixhiku përmendi edhe kontributin e Bukoshit në LDK.

“Dr. Bukoshi ishte ndër figurat themeluese të Lidhjes Demokratike të Kosovës, më pas duke shërbyer edhe si sekretar i përgjithshëm në atë kohë. Me vizion dhe guxim, ai dha një kontribut të jashtëzakonshëm në rrugëtimin tonë drejt lirisë”.

Abdixhiku tha se figura e tij do të mbetet përherë pjesë e pandashme e historisë sonë shtetformuese dhe kujtimi për të do të jetojë ndër breza.

“Në këto çaste të dhimbshme, më lejoni që në emrin tim personal dhe të Lidhjes Demokratike të Kosovës, t’ju shpreh ngushëllimet më të sinqerta për humbjen e më të dashurit të tyre familjes Bukoshi, miqve dhe gjithë bashkëpunëtorëve të tij. I përjetshëm qoftë kujtimi për Dr. Bujar Bukoshin. I lehtë qoftë dheu i Kosovës!”./Express/