Ylli i NBA tregon pasojat e koronavirusit: Kam humbur shqisat e nuhatjes dhe shijimit

Gazeta Express

24/03/2020 10:33

Humbja e shqisave të shijimit dhe nuhatjes po raportohet të jetë si njëra ndër efektet e të qenët i infektuar me koronavirus. Qendra e Utah Jazz, Rudy Gobert, e ka konfirmuar se ai po i përjeton pikërisht këto dy simptoma, përderisa po rikuperohet nga ky virus.

Ylli i NBA, Rudy Gobert, ishte basketbollisti i parë në ligën elitare amerikane që doli pozitiv në testin për Covid-19, duke bërë që NBA të pezullohet përkohësisht, pa datë kthimi, transmeton Gazeta Express.

Ai fillimisht kishte lajmëruar tifozët se po ndihej mirë, pasi edhe disa bashkëlojtarë të tij dolën pozitivë në këtë test, duke thënë se po përmirësohej çdo ditë e më shumë.

Megjithatë, në ditët e fundit, Gobert ka qenë duke i përjetuar edhe disa efekte të tjera të të qenët i infektuar me koronavirus dhe shkroi në llogarinë e tij në Twitter për t’i pyetur tifozët e tij se a janë duke i pasur edhe ata këto simptoma.

“Vetëm dua t’ju njoftoj juve djema për të rejat e fundit. Humbja e shqisave të shijimit dhe nuhatjes janë definitivisht ndër simptomat”, shkroi francezi.

“Unë s’kam qenë në gjendje të nuhasë asgjë në katër ditët e fundit. A po e përjeton ndokush të njëjtën gjë?”

Gobert e kishte konfirmuar se është infektuar me koronavirus para 12 ditëve, më 12 mars, gjë që kishte bërë të shtyhej ndeshja mes Utah Jazz dhe Oklahoma City Thunder. /Gazeta Express/