Kryeministri në detyrë, Ramush Haradinaj ka reaguar pas deklaratave të Presidentit të Serbisë, Aleksandër Vuçiq, i cili tha se masakra e Reçakut është fabrikuar dhe se gjithçka është falsifikuar nga siç tha “mashtruesi botëror, hajni dhe vagabondi William Walker”, raporton Express.
Përmes një postimi në llogarinë e tij në Facebook, Haradinaj ka thënë se ky qëndrim i Vuçiqit dëshmon qartë se Serbia edhe në formë institucionale e ruan paturpësisht mendësinë kriminale e të trashëguar nga koha e Millosheviqit.
“Urrejtja patologjike e Vuçiqit ndaj shqiptarëve, po dëshmohet edhe me deklarimin e tij të fundit, se masakra e Reçakut e cila tronditi mbarë botën në vitin 1999 është e fabrikuar. Ky qëndrim dëshmon qartë se Serbia edhe në formë institucionale e ruan paturpësisht mendësinë kriminale e të trashëguar nga koha e Millosheviqit”, ka shkruar Haradinaj.
Haradinaj ka thënë se është për keqardhje se si Serbia, që konsiderohet si shtet favorit nga BE-ja, vazhdon ta kultivojë urrejtjen etnike ndaj shqiptarëve dhe mohon krimet gjenocidale të saja, “duke kontaminuar kështu të ardhmen e tyre dhe duke zvogëluar shanset për paqe dhe pajtim në rajon”.
Ndryshe, Vuçiq e ka quajtur “të tmerrshme” atë që Ivan Todosijeviq është dënuar me dy vjet burg, sepse ka thënë se krimi në Reçak ”është trilluar”.
“Të gjithë anëtarët e Listës Serbe do të përsërisin të njëjtën, edhe unë e përsëris tani – krimi në Reçak është fabrikuar, ku gjithçka ka falsifikuar ai mashtruesi botëror, hajni dhe vagabondi William Walker”, ka thënë Vuçiq duke i kopjuar fjalë për fjalë pretendimet e ish-shefit të tij dhe kriminelit të luftës Vojisllav Sheshel, të cilit para 20 vjetëve i shërbente birra nëpër mbledhje./Gazeta Express