Artisti shqiptar vjen me një instalacion monumental para OKB-së, kushtuar viktimave të zhdukjes me dhunë

Lajme

Gazeta Express

06/08/2026 13:39

Në kuadër të Marshit për Drejtësi, që mbahet më 30 gusht 2026, në Ditën Ndërkombëtare të Viktimave të Zhdukjeve me Dhunë, artisti shqiptar Ramë Dardania do të realizojë, për herë të parë në Sheshin e Kombeve, përballë Selisë së Kombeve të Bashkuara në Gjenevë, një vepër artistike monumentale kushtuar mijëra personave të rrëmbyer e të zhdukur me dhunë në Kosovë dhe në mbarë botën, njoftojnë organizatorët e edicionit të dytë të këtij manifestimi nga Shoqata kulturore « Dora d’Istria » nga Gjeneva, shkruan albinfo.

Kjo nuk është thjesht një vepër arti. Është një thirrje për ndërgjegjen njerëzore, një homazh për viktimat dhe një mesazh i fuqishëm për të vërtetën, drejtësinë dhe kujtesën.

Çfarë do të ndodhë më 30 gusht në Sheshin e Kombeve? Përgjigjja nuk mund të përshkruhet me disa fotografi apo me pak fjalë. Ajo duhet të përjetohet.

Për herë të parë, Ramë Dardania do të prezantojë një instalacion artistik të krijuar posaçërisht për këtë ditë, një vepër të paprecedentë që do ta shndërrojë një nga sheshet më simbolike të botës në një hapësirë kujtese, reflektimi dhe emocioni.

Pa zbuluar atë që publiku do të shohë më 30 gusht, mund të themi se bëhet fjalë për një instalacion artistik monumental, i shtrirë në një hapësirë prej dhjetëra metrash katrorë. Çdo element është konceptuar me një qëllim të caktuar, duke krijuar një përvojë që shkon përtej artit pamor.

Vizitori nuk do të përballet thjesht me një vepër, por do të hyjë në një rrëfim artistik që e fton të ndalet, të vëzhgojë, të reflektojë dhe ta përjetojë atë. Nuk do të jetë vetëm spektator, por pjesë e një udhëtimi emocional që zgjon ndërgjegjen dhe i jep zë një heshtjeje që vazhdon prej dekadash.

Me një mjeshtëri të rrallë artistike, Ramë Dardania sjell një krijim unik, të konceptuar për të lënë gjurmë në kujtesën e çdo vizitori dhe për të ngjallur pyetje që nuk marrin përgjigje të lehta. Një vepër që nuk premton vetëm të shihet, por të mbahet mend.

Në një vend ku takohen shtetet e botës për të mbrojtur paqen dhe të drejtat e njeriut, kjo vepër do të rikujtojë se pas çdo personi të zhdukur me dhunë fshihet një histori, një familje dhe një pritje që ende nuk ka marrë fund.

Ata që do të jenë të pranishëm nuk do të jenë vetëm spektatorë, por dëshmitarë të premierës së një krijimi artistik unik, i cili synon të mbetet gjatë në kujtesën e publikut.

Pas premierës së saj në Gjenevë, kjo vepër është planifikuar të prezantohet edhe në Sheshin “Skënderbeu” në Kosovë, duke krijuar një urë simbolike mes Gjenevës dhe Kosovës dhe duke përcjellë një mesazh universal: se e vërteta do të triumfojë, drejtësia do të vendoset dhe kujtesa do të jetojë në memorien tonë kolektive, përtej kufijve të Kosovës. E vërteta, drejtësia dhe kujtesa nuk njohin kufij. Sepse kudo që jemi, “Përderisa i kujtojmë, ata jetojnë.”