Irani kërcënon Qipron dhe Bullgarinë, ministri Araghchi: Mos i përdorni bazat në sulmet kundër nesh!

Lajme

Gazeta Express

30/07/2026 20:24

Teherani ka lëshuar paralajmërime të reja si për Qipron, ashtu edhe për Bullgarinë, që të mos përdorin bazat e tyre për sulme kundër Iranit.

Paralajmërimi u bë nëpërmjet ministrit Abbas Araghchi, ndërsa retorika iraniane përshkallëzohet kundër vendeve që presin ose lehtësojnë operacionet ushtarake të Shteteve të Bashkuara në rajon.

Në veçanti, sipas Times Of Israel, në një bisedë telefonike me Ministrin e Jashtëm të Qipros, Constantinos Kobos, Araghchi theksoi rëndësinë e mospërdorimit të bazave ushtarake të huaja të vendosura në territorin qipriot për operacione kundër Iranit.

Qiproja është shtëpia e dy bazave të mëdha ushtarake britanike, përfshirë bazën e RAF në Akrotiri. Më herët këtë vit, baza u godit nga një dron iranian, disa ditë pas sulmeve izraelite dhe amerikane që shënuan fillimin e konfliktit me Iranin.

Reagime të forta ndaj bazës Bezmer në Bullgari

Në një telefonatë me Ministren e Jashtme bullgare Velislava Petrova-Tsamova, Araghchi i bëri thirrje Sofjes të rishqyrtojë vendimin e saj për të lejuar vendosjen e përkohshme të avionëve ushtarakë amerikanë në bazën ajrore Besmer.

Sipas ministrit iranian, miratimi i kërkesës së Shteteve të Bashkuara për të stacionuar avionë që mbështesin operacionet ushtarake përbën lehtësim të veprimeve agresive kundër Iranit dhe është i papajtueshëm me marrëdhëniet tradicionalisht miqësore midis dy vendeve.

Teherani ka paralajmëruar vazhdimisht se shtetet që lejojnë që territori i tyre të përdoret për operacione ushtarake amerikane kundër Iranit mund të përballen me pasoja.

Vendimi i Parlamentit Bullgar

Javën e kaluar, parlamenti bullgar miratoi vendosjen e përkohshme të deri në tetë avionëve amerikanë të furnizimit me karburant KC-135 dhe deri në 250 personel në Bazën Ajrore Bezmer, pavarësisht kundërshtimeve nga Teherani.

Qeveria bullgare ka sqaruar se nuk do të vendosen sisteme armësh sulmuese në bazë dhe se vendimi nuk e bën vendin pjesë të operacioneve ushtarake. /Panorama