Iraku thotë se nuk ka prova që territori i tij është përdorur për të nisur sulme ndaj Arabisë Saudite

Lajme

Gazeta Express

30/07/2026 13:30

Nuk ka prova se territori i Irakut është përdorur për të nisur sulme ndaj Arabisë Saudite më herët gjatë kësaj jave, tha sot për mediat shtetërore një zëdhënës i kryeministrit të vendit, shkruan CNN.

Ministria saudite e Mbrojtjes tha këtë javë se sulmet me dronë, të nisura nga Iraku, kishin në shënjestër infrastrukturën kritike të vendit dhe kryeqytetin Riad të hënën dhe të martën.

“Deri më tani, asnjë palë nuk ka paraqitur ndonjë provë për t’i mbështetur këto pretendime”, tha zëdhënësi i kryeministrit irakian, Sabah Al-Numan, për Agjencinë e Lajmeve të Irakut.

“Qeveria nuk do të tolerojë asnjë veprim të njëanshëm që buron nga brenda Irakut, ndërsa në të njëjtën kohë nuk do të pranojë asnjë shkelje që vjen nga jashtë kufijve të saj”, shtoi Al-Numan.

Të mërkurën, sulmet amerikano-saudite në Irak vranë të paktën 20 persona dhe plagosën 32 të tjerë, sipas Forcave të Mobilizimit Popullor, një milici irakiane e lidhur me Iranin.

Kryeministri i Irakut, Ali al-Zaidi, u zotua gjatë një takimi me presidentin amerikan Donald Trump këtë muaj se vendi i tij do të përballet me milicitë e mbështetura nga Irani në territorin e Irakut, një objektiv që u ka shpëtuar qeverive të mëparshme irakiane.